phulon ko chhune se nashtar zaKHmi hoga

phūloñ ko chhūne se nashtar zaḳhmī hogā

ab ke sar meñ lag kar patthar zaḳhmī hogā

kaafī din ke ba.ad safar se lauTā huuñ maiñ

jism thakan se chuur hai bistar zaḳhmī hogā

mausam ke chehre kī shikneñ kahtī haiñ

āñhkeñ hoñgī yā phir manzar zaḳhmī hogā

maujeñ dariyā ke siine par kyā likhtī haiñ

sochā to maiñ andar andar zaḳhmī hogā

barg-e-gul par sūraj ke neze mat rakkho

bholī-bhālī titlī kā par zaḳhmī hogā

ā.ankhoñ kī bastī meñ jab bāzār sajegā

kachche sapnoñ kā saudāgar zaḳhmī hogā

maiñ hāthoñ meñ ḳhanjar le kar soch rahā huuñ

lauTūñgā to merā bhī ghar zaḳhmī hogā

phulon ko chhune se nashtar zaKHmi hoga

ab ke sar mein lag kar patthar zaKHmi hoga

kafi din ke baad safar se lauTa hun main

jism thakan se chur hai bistar zaKHmi hoga

mausam ke chehre ki shiknen kahti hain

aanhken hongi ya phir manzar zaKHmi hoga

maujen dariya ke sine par kya likhti hain

socha to main andar andar zaKHmi hoga

barg-e-gul par suraj ke neze mat rakkho

bholi-bhaali titli ka par zaKHmi hoga

aaankhon ki basti mein jab bazar sajega

kachche sapnon ka saudagar zaKHmi hoga

main hathon mein KHanjar le kar soch raha hun

lauTunga to mera bhi ghar zaKHmi hoga