shahr ka rog hai jis samt bhi bas jaega tu

shahr kā rog hai jis samt bhī bas jā.egā tū

khule sahrāoñ kī āvāz ko Das jā.egā tū

jab bhī yādoñ kī zamistānī havā chīḳhegī

apne barfīle makānoñ meñ jhulas jā.egā tū

soḳhta shaam kī mahmil huuñ maiñ jaatā hai kahāñ

saath mere hī ba-andāz-e-jaras jā.egā tū

aaj maiñ apne ta.āqub meñ nikal jā.ūñgā

kal mire naqsh-e-kaf-e-pā ko taras jā.egā tū

dekh vo dasht kī dīvār hai sab kā maqtal

is baras jā.ūñgā maiñ agle baras jā.egā tū

maiñ bujhī mahfiloñ kī ashtray kī ik pyaas

raakh ban kar mire hoñToñ pe baras jā.egā tū

is qadar rasm-o-rah-e-jism 'musavvir' na baḌhā

apne hī jism ko ik roz taras jā.egā tū

shahr ka rog hai jis samt bhi bas jaega tu

khule sahraon ki aawaz ko Das jaega tu

jab bhi yaadon ki zamistani hawa chiKHegi

apne barfile makanon mein jhulas jaega tu

soKHta sham ki mahmil hun main jata hai kahan

sath mere hi ba-andaz-e-jaras jaega tu

aaj main apne taaqub mein nikal jaunga

kal mere naqsh-e-kaf-e-pa ko taras jaega tu

dekh wo dasht ki diwar hai sab ka maqtal

is baras jaunga main agle baras jaega tu

main bujhi mahfilon ki ashtray ki ek pyas

rakh ban kar mere honTon pe baras jaega tu

is qadar rasm-o-rah-e-jism 'musawwir' na baDha

apne hi jism ko ek roz taras jaega tu