tere naz-o-ada ko tere diwane samajhte hain

tire nāz-o-adā ko tere dīvāne samajhte haiñ

haqīqat sham.a kī kyā hai ye parvāne samajhte haiñ

mukammal vārdāteñ haiñ mire guzre zamāne kī

haqā.eq se jo nā-vāqif haiñ afsāne samajhte haiñ

junūñ ke kaif-o-kam se āgahī tujh ko nahīñ nāseh

guzartī hai jo dīvānoñ pe dīvāne samajhte haiñ

tirī maḳhmūr āñkhoñ ko koī kuchh bhī kahe lekin

ham un ko sāqī-e-daurāñ ke paimāne samajhte haiñ

na raas ā.eñgī mujh ko ai jahāñ ābādiyāñ terī

mire dil kī lagī ko tere vīrāne samajhte haiñ

na kuchh ahl-e-junūñ samjhe na kuchh ahl-e-ḳhirad samjhe

rumūz-e-zindagī kuchh phir bhī mastāne samajhte haiñ

'zakī' apnoñ ne to ham ko hamesha hī satāyā hai

haqīqat kuchh hamārī phir bhī be-gāne samajhte haiñ

tere naz-o-ada ko tere diwane samajhte hain

haqiqat shama ki kya hai ye parwane samajhte hain

mukammal wardaten hain mere guzre zamane ki

haqaeq se jo na-waqif hain afsane samajhte hain

junun ke kaif-o-kam se aagahi tujh ko nahin naseh

guzarti hai jo diwanon pe diwane samajhte hain

teri maKHmur aankhon ko koi kuchh bhi kahe lekin

hum un ko saqi-e-dauran ke paimane samajhte hain

na ras aaengi mujh ko ai jahan aabaadiyan teri

mere dil ki lagi ko tere virane samajhte hain

na kuchh ahl-e-junun samjhe na kuchh ahl-e-KHirad samjhe

rumuz-e-zindagi kuchh phir bhi mastane samajhte hain

'zaki' apnon ne to hum ko hamesha hi sataya hai

haqiqat kuchh hamari phir bhi be-gane samajhte hain