ye to hathon ki lakiron mein tha girdab koi

ye to hāthoñ kī lakīroñ meñ thā girdāb koī

itne se paanī meñ agar ho gayā ġharqāb koī

ġham ziyāda haiñ bahut āñkheñ haiñ sahrā sahrā

ab to aa jaa.e yahāñ ashkoñ kā sailāb koī

ishq kā faiz hai ye tū jo chahak uTThā hai

be-sabab itnā bhī hotā nahīñ shādāb koī

abr ban kar mujhe āġhosh meñ le aur samajh

kaise sahrā ko kyā kartā hai sairāb koī

tarbiyat diid kī dete haiñ jo haiñ lā.iq-e-dīd

ḳhud kahāñ jāntā hai diid ke ādāb koī

ye jo har dhuup ko lalkārtī rahtī hai sadā

kyā mire sar pe duāoñ kī hai mehrāb koī

kaisī tābīr kī hasrat ki 'ziyā' barsoñ se

nā-murād āñkhoñ ne dekhā hī nahīñ ḳhvāb koī

ye to hathon ki lakiron mein tha girdab koi

itne se pani mein agar ho gaya gharqab koi

gham ziyaada hain bahut aankhen hain sahra sahra

ab to aa jae yahan ashkon ka sailab koi

ishq ka faiz hai ye tu jo chahak uTTha hai

be-sabab itna bhi hota nahin shadab koi

abr ban kar mujhe aaghosh mein le aur samajh

kaise sahra ko kya karta hai sairab koi

tarbiyat did ki dete hain jo hain laiq-e-did

KHud kahan jaanta hai did ke aadab koi

ye jo har dhup ko lalkarti rahti hai sada

kya mere sar pe duaon ki hai mehrab koi

kaisi tabir ki hasrat ki 'ziya' barson se

na-murad aankhon ne dekha hi nahin KHwab koi