زیر تبصرہ کتاب "اقبال شناسی اور افشاں" علامہ اقبال کے سوانحی، علمی، ادبی، اور روحانی، نیز ان کے افکار و نظریات کے جملہ مضامین پر محیط ہے۔ اس کتاب کے مرتب جناب بیدار ملک نے مختلف عنوان سے اٹھارہ مضامین کو اس کتاب میں ترتیب دیا ہے۔ اور ایک مختصر مگر جامع دیباچہ بھی تحریر کیا ہے۔ وہ لکھتے ہیں کہ ہم نے تین تعلیمی اداروں کے مجلوں سے اقبال اور اقبالیات پر چھپے ہوئے مضامین کا انتخاب کیا جن میں لاہور کے مجلہ 'فاران' اور 'کریسنٹ' کو شامل کیا۔ اس انتخاب میں شامل پہلا مضمون محمد عبد اللہ قریشی کا ہے جس کا عنوان 'اقبال کی زندگی کا نصب العین' ہے۔ اس کے علاوہ پروفیسر عابد علی عابد، پروفیسر یوسف جمال انصاری، جناب عبد المجید سالک جیسے مشاہیر شامل ہیں۔ آخر میں ایک مضمون پروفیسر ریاض حسین صاحب کا ہے جو انگریزی زبان میں مرقوم ہے۔ غرص یہ کہ زیر نظر مجموعہ لاہور کے مجلہ 'افشاں' میں سے اقبالیات کے موضوع پر مضامین کاایک خوبصورت انتخاب ہے۔