زیر تبصرہ کتاب "پیاس" بشیشر پردیپ کا افسانوی مجموعہ ہے، افسانوں میں نفسیاتی مسائل اور فرد کی زندگی کے مسائل کو بخوبی پیش کیا گیا ہے، جن میں سماج کا عکس بھی بخوبی نظر آتا ہے، افسانہ 'سکون' مدھو کی نفسیاتی کیفیت کو بیان کرتا ہے، جو کیپٹن راجیش کی منتظر ہے، اس کی موت کا یقین نہیں کرتی ہے، شادی کے دو ماہ بعد بھی وہ ذہنی کشمکش میں مبتلا ہے، پھر ایک ایسا واقعہ پیش آتا ہے، جس کی وجہ سے وہ راجیش کی موت پر یقین کرلیتی ہے، افسانہ بہت خوبصورت طریقہ سے بنا گیا ہے۔ 'گھسیٹن' کی تکالیف پر روشنی ڈالی گئی ہے، جس میں غربت کے مسائل بخوبی نظر آتے ہیں۔ 'شادی سے پہلے' افسانے میں دو کامیاب لوگوں کی محبت اور اس کے مسائل پر روشنی ڈالی گئی ہے۔ افسانہ 'دس سال بعد' میں راکیش اور منجری کی نفسیاتی صورت حال پرروشنی ڈالی گئی ہے، راجیش منجری کو پسند کرتا ہے، لیکن محبت نہیں کرتا، افسانے کا اختتام بہت دلچسپ ہے۔ پردیپ کے افسانوں میں تمہیدی گفتگو نہیں ہے، زبان و بیان بھی خوب ہے۔