ai umr zara aahista chal

ai umr zarā āhista chal āhista chal ai umr-e-ravāñ

pur-kaif chaman phir mast huā mausam bhī hasīñ aur dil bhī javāñ

vo lutf kahāñ hai manzil meñ jo lutf safar meñ hai nādāñ

jab manzil par aa jā.egī phir pachhtā.egī ai pāgal

ai umr zarā āhista chal

āḳhir itnī jaldī kyā hai kuchh dekh to dilkash nazzāre

mīThe chashme ThanDe dariyā ūñche Tiile bahte dhāre

shabnam meñ kausar kī maujeñ zarroñ meñ jannat ke taare

komal kirnoñ kī gardan meñ ye bāñheñ Daale jamunā jal

ai umr zarā āhista chal

jī-bhar ke zarā maiñ dekh to luuñ is album kī sab tasvīreñ

parvat par jā ke paḌh to luuñ naqqāsh-e-azal kī tahrīreñ

jhīloñ se jā ke sun to luuñ rangīñ fitrat kī tafsīreñ

maiñ ghuum to luuñ bastī bastī vaadī vaadī jangal jangal

ai umr zarā āhista chal

sahrā meñ tarāre bhartā hai ik bholā-bhālā mast hiran

dariyā kī taraf bal khātī hai ik sāras kī lambī gardan

jote hue khet meñ sotī hai ik bīr-bahūTī kī dulhan

pur-kaif havā meñ uḌtā hai ik dahshat kā maarā hariyal

ai umr zarā āhista chal

naġhmoñ se gūñjī jaatī hai ye duniyā kī mahfil saarī

peḌoñ par mastī kā aalam shāmā kī lai se hai taarī

sargam ke sātoñ mīThe sur tuutī ke lab par haiñ jaarī

mad.hosh papīhā gaatā hai sahrā meñ dard-angez ġhazal

ai umr zarā āhista chal

shāyad kausar kī maujeñ bhī aise naġhme bikhrā na sakeñ

mumkin hai ġhilmāñ ke gaane itnā tujh ko bahlā na sakeñ

jannat kī hūreñ bhī shāyad is rangīñ lai meñ gā na sakeñ

jis pancham sur meñ gaatī hai ye barkhā kī mīThī koyal

ai umr zarā āhista chal

do phuul kañval ke paanī meñ un par bhauñrā hai yuuñ raqsāñ

jis tarah kabūtar hāthoñ se chhoḌe koī alhaḌ nādāñ

shāyad in donoñ phūloñ meñ hai ek salīm ik nuur jahāñ

mīnā-bāzār banāte haiñ paanī meñ do mad.hosh kañval

ai umr zarā āhista chal

vo chāñd kī siitā bhāgtī hai Dar ke maare sū-e-gulshan

vo us kā pīchhā kartā hai tezī se bādal kā rāvan

vo us kī jānib baḌhtā hai ye apnā bachātī hai dāman

ākāsh pe lanka kā manzar dikhlāte haiñ chāñd aur bādal

ai umr zarā āhista chal

sarhad par 'salām' is manzil kī naddī naale kā naam nahīñ

chatiyal maidāñ phir dhuup kaḌī aur paanī kā ik jaam nahīñ

pal bhar ke liye pāgal ruk jā go ruknā terā kaam nahīñ

maiñ bhar luuñ mīThe chashmoñ se ye apnī miTTī kī chhāgal

ai umr zarā āhista chal

ai umr zara aahista chal aahista chal ai umr-e-rawan

pur-kaif chaman phir mast hua mausam bhi hasin aur dil bhi jawan

wo lutf kahan hai manzil mein jo lutf safar mein hai nadan

jab manzil par aa jaegi phir pachhtaegi ai pagal

ai umr zara aahista chal

aaKHir itni jaldi kya hai kuchh dekh to dilkash nazzare

miThe chashme ThanDe dariya unche Tile bahte dhaare

shabnam mein kausar ki maujen zarron mein jannat ke tare

komal kirnon ki gardan mein ye banhen Dale jamuna jal

ai umr zara aahista chal

ji-bhar ke zara main dekh to lun is album ki sab taswiren

parwat par ja ke paDh to lun naqqash-e-azal ki tahriren

jhilon se ja ke sun to lun rangin fitrat ki tafsiren

main ghum to lun basti basti wadi wadi jangal jangal

ai umr zara aahista chal

sahra mein tarare bharta hai ek bhola-bhaala mast hiran

dariya ki taraf bal khati hai ek saras ki lambi gardan

jote hue khet mein soti hai ek bir-bahuTi ki dulhan

pur-kaif hawa mein uDta hai ek dahshat ka mara hariyal

ai umr zara aahista chal

naghmon se gunji jati hai ye duniya ki mahfil sari

peDon par masti ka aalam shama ki lai se hai tari

sargam ke saton miThe sur tuti ke lab par hain jari

madhosh papiha gata hai sahra mein dard-angez ghazal

ai umr zara aahista chal

shayad kausar ki maujen bhi aise naghme bikhra na saken

mumkin hai ghilman ke gane itna tujh ko bahla na saken

jannat ki huren bhi shayad is rangin lai mein ga na saken

jis pancham sur mein gati hai ye barkha ki miThi koyal

ai umr zara aahista chal

do phul kanwal ke pani mein un par bhaunra hai yun raqsan

jis tarah kabutar hathon se chhoDe koi alhaD nadan

shayad in donon phulon mein hai ek salim ek nur jahan

mina-bazar banate hain pani mein do madhosh kanwal

ai umr zara aahista chal

wo chand ki sita bhagti hai Dar ke mare su-e-gulshan

wo us ka pichha karta hai tezi se baadal ka rawan

wo us ki jaanib baDhta hai ye apna bachati hai daman

aakash pe lanka ka manzar dikhlate hain chand aur baadal

ai umr zara aahista chal

sarhad par 'salam' is manzil ki naddi nale ka nam nahin

chatiyal maidan phir dhup kaDi aur pani ka ek jam nahin

pal bhar ke liye pagal ruk ja go rukna tera kaam nahin

main bhar lun miThe chashmon se ye apni miTTi ki chhagal

ai umr zara aahista chal