birah git

shor machā hai sāvan aaya

gulzāroñ par joban aaya

chham-chham paanī baras rahā hai

milne ko bhī taras rahā hai

bijlī se māmūr ghaTā.eñ

tārīk-o-pur-nūr ghaTā.eñ

barkhā rut kī rain andherī

kaañp rahī hai chhātī merī

jis se javānī phūlī jaa.e

sāvan aaya tum nahīñ aa.e

ham donoñ the man ke bhikārī

prem-pujāran prem-pujārī

priit ke dīvāne the ham tum

sach-much afsāne the ham tum

donoñ meñ paimān-e-vafā thā

aur rag rag meñ ishq basā thā

phir nahīñ aate haiñ kyoñ vo din

chain nahīñ hai sājan tum bin

sabr kā pyāla chhalkā jaa.e

sāvan aaya tum nahīñ aa.e

ye ThanDī pur-kaif havā.eñ

tum aao to lutf uThā.eñ

bhīgī bhīgī raat suhānī

aur tāroñ kī zau-afshānī

saarī duniyā nikhar rahī hai

goyā chāñdī bikhar rahī hai

ye mausam aur tum se judā.ī

jū-e-tamanna yuuñ murjhā.ī

ranj-o-alam ke bādal chhā.e

sāvan aaya tum nahīñ aa.e

shor macha hai sawan aaya

gulzaron par joban aaya

chham-chham pani baras raha hai

milne ko bhi taras raha hai

bijli se mamur ghaTaen

tarik-o-pur-nur ghaTaen

barkha rut ki rain andheri

kanp rahi hai chhati meri

jis se jawani phuli jae

sawan aaya tum nahin aae

hum donon the man ke bhikari

prem-pujaran prem-pujari

prit ke diwane the hum tum

sach-much afsane the hum tum

donon mein paiman-e-wafa tha

aur rag rag mein ishq basa tha

phir nahin aate hain kyon wo din

chain nahin hai sajan tum bin

sabr ka pyala chhalka jae

sawan aaya tum nahin aae

ye ThanDi pur-kaif hawaen

tum aao to lutf uThaen

bhigi bhigi raat suhani

aur taron ki zau-afshani

sari duniya nikhar rahi hai

goya chandi bikhar rahi hai

ye mausam aur tum se judai

ju-e-tamanna yun murjhai

ranj-o-alam ke baadal chhae

sawan aaya tum nahin aae