chait ki raaten yaad karo

chait kī rāteñ yaad karo

nikhrā thā jab chāñd kā chehra

bikhrā thā kirnoñ kā sahrā

gaa.e the jab giit havā ne

aa.e the tum niiñd churāne

bholī bāteñ yaad karo

chait kī rāteñ yaad karo

chanchal taare muskāte the

yuuñ ākāsh meñ chhup jaate the

jaise khetoñ meñ ham-jolī

khel rahe hoñ āñkh-micholī

pyārī ghāteñ yaad karo

chait kī rāteñ yaad karo

ābādī se duur nikal kar

ek na.e sāñche meñ Dhal kar

be-sudh ham tum hote the jab

nain ḳhushī se rote the jab

vo barsāteñ yaad karo

chait kī rāteñ yaad karo

chait ki raaten yaad karo

nikhra tha jab chand ka chehra

bikhra tha kirnon ka sahra

gae the jab git hawa ne

aae the tum nind churane

bholi baaten yaad karo

chait ki raaten yaad karo

chanchal tare muskate the

yun aakash mein chhup jate the

jaise kheton mein ham-joli

khel rahe hon aankh-micholi

pyari ghaten yaad karo

chait ki raaten yaad karo

aabaadi se dur nikal kar

ek nae sanche mein Dhal kar

be-sudh hum tum hote the jab

nain KHushi se rote the jab

wo barsaten yaad karo

chait ki raaten yaad karo