aa baiTh to mere samne o dildar planning karte hain

aa baiTh to mere sāmne o dildār planning karte haiñ

duniyā se bachānā hai kaise ab pyaar planning karte haiñ

har ek pe kab khulte haiñ ye ai dost tumheñ ma.alūm to hai

kuchh ḳhaas parindoñ se mil kar ashjār planning karte haiñ

so shak kī koī gunjā.ish na.iiñ ye baat ayaañ to sab par hai

jab mil baiTheñ to zāhir hai phir yaar planning karte haiñ

lagtā hai asar nahīñ kartī ab koī bhī davā un par sāhib

har roz masīhā se mil kar bīmār planning karte haiñ

ye dasht hai itnā sahl nahīñ is vīrāne meñ rah jaanā

kuchh soch ke hī ham vahshat meñ har baar planning karte haiñ

jo sochte haiñ vo hotā na.iiñ jo na.iiñ hotā vo sochte haiñ

yuuñ lagtā hai 'mannān' ki ham be-kār planning karte haiñ

aa baiTh to mere samne o dildar planning karte hain

duniya se bachana hai kaise ab pyar planning karte hain

har ek pe kab khulte hain ye ai dost tumhein malum to hai

kuchh KHas parindon se mil kar ashjar planning karte hain

so shak ki koi gunjaish nain ye baat ayan to sab par hai

jab mil baiThen to zahir hai phir yar planning karte hain

lagta hai asar nahin karti ab koi bhi dawa un par sahib

har roz masiha se mil kar bimar planning karte hain

ye dasht hai itna sahl nahin is virane mein rah jaana

kuchh soch ke hi hum wahshat mein har bar planning karte hain

jo sochte hain wo hota nain jo nain hota wo sochte hain

yun lagta hai 'mannan' ki hum be-kar planning karte hain