aa gaya hai waqt ab bhugtoge KHamiyaze bahut

aa gayā hai vaqt ab bhugtoge ḳhamiyāze bahut

ham faqīroñ par kase tum ne bhī āvāze bahut

tum ne jo qisse kiye mansūb merī zaat se

thī haqīqat un meñ thoḌī aur andāze bahut

jin ko apnī kāmyābī kā baḌā pindār thā

ham ne dekhe haiñ bikharte un ke shīrāze bahut

ghuT na jaa.e dam kahīñ nafrat ke is māhaul meñ

kar liye ham ne muqaffal dil ke darvāze bahut

shahr ke mele meñ yuuñ to gul-ruḳhoñ kī bhiiḌ thī

in meñ chehre the magar kam aur the ġhāze bahut

bas vahī hogā razā ko terī jo manzūr hai

kaam ā.eñge na computer ke andāze bahut

ham ne Thukrā.e na-jāne kitne āñkhoñ ke payām

mah-vashoñ ne ham pe khole dil ke darvāze bahut

rafta rafta vaqt ke marham se bhar hī jā.eñge

ishq ne jo zaḳhm baḳhshe haiñ abhī taaze bahut

ham sharīf insāñ 'shabāb' is ghar meñ nā-mahfūz haiñ

is meñ darvāze to kam haiñ chor darvāze bahut

aa gaya hai waqt ab bhugtoge KHamiyaze bahut

hum faqiron par kase tum ne bhi aawaze bahut

tum ne jo qisse kiye mansub meri zat se

thi haqiqat un mein thoDi aur andaze bahut

jin ko apni kaamyabi ka baDa pindar tha

hum ne dekhe hain bikharte un ke shiraaze bahut

ghuT na jae dam kahin nafrat ke is mahaul mein

kar liye hum ne muqaffal dil ke darwaze bahut

shahr ke mele mein yun to gul-ruKHon ki bhiD thi

in mein chehre the magar kam aur the ghaze bahut

bas wahi hoga raza ko teri jo manzur hai

kaam aaenge na computer ke andaze bahut

hum ne Thukrae na-jaane kitne aankhon ke payam

mah-washon ne hum pe khole dil ke darwaze bahut

rafta rafta waqt ke marham se bhar hi jaenge

ishq ne jo zaKHm baKHshe hain abhi taze bahut

hum sharif insan 'shabab' is ghar mein na-mahfuz hain

is mein darwaze to kam hain chor darwaze bahut