aa ja andheri raaten tanha bita chuka hun

aa jā añdherī rāteñ tanhā bitā chukā huuñ

sham.eñ jahāñ na jaltīñ āñkheñ jalā chukā huuñ

ḳhurshīd-e-shām-e-rafta lauTe to us se pūchhūñ

maiñ zindagī kī kitnī sub.heñ gañvā chukā huuñ

ummīd-o-bīm-e-shab ne ye bhī bhulā diyā hai

kitne diye jalā.e kitne bujhā chukā huuñ

maiñ bāz-gasht-e-dil huuñ paiham shikast-e-dil huuñ

vo aazmā rahā huuñ jo aazmā chukā huuñ

ye shab bujhī bujhī hai shāyad ki āḳhirī hai

ai sub.h-e-dard tere nazdīk aa chukā huuñ

mujh ko fareb mat de ai mausam-e-bahārāñ

aise ka.ī shagūfe maiñ bhī khilā chukā huuñ

sūraj tulūa hoñ yā sūraj ġhurūb 'sahbā'

shab-hā-e-ġham ke parde ḳhud par girā chukā huuñ

aa ja andheri raaten tanha bita chuka hun

shamen jahan na jaltin aankhen jala chuka hun

KHurshid-e-sham-e-rafta lauTe to us se puchhun

main zindagi ki kitni subhen ganwa chuka hun

ummid-o-bim-e-shab ne ye bhi bhula diya hai

kitne diye jalae kitne bujha chuka hun

main baz-gasht-e-dil hun paiham shikast-e-dil hun

wo aazma raha hun jo aazma chuka hun

ye shab bujhi bujhi hai shayad ki aaKHiri hai

ai subh-e-dard tere nazdik aa chuka hun

mujh ko fareb mat de ai mausam-e-bahaaran

aise kai shagufe main bhi khila chuka hun

suraj tulua hon ya suraj ghurub 'sahba'

shab-ha-e-gham ke parde KHud par gira chuka hun