aa na jaana baat mein shaitan ki

aa na jaanā baat meñ shaitān kī

yaad rakhnā hashr ke maidān kī

bāġh-e-dil kā tazkira kuchh yuuñ huā

baat jaise ho kisī shamshān kī

ghar se barakat is liye bhī uTh ga.ī

qadr kar paa.e na dastarḳhvān kī

kah nahīñ saktā mukammal jo ġhazal

vo bhī tayyārī meñ hai dīvān kī

maiñ to kab kā mar chukā huuñ dosto

ye sadā hai dafn ke e'lān kī

ham ne dekhā pattharoñ ko TūTte

ham ne chīḳheñ bhī sunīñ chaTTān kī

'faiz' kar do kal adā qarz-e-vafā

āḳhirī tārīḳh hai bhugtān kī

aa na jaana baat mein shaitan ki

yaad rakhna hashr ke maidan ki

bagh-e-dil ka tazkira kuchh yun hua

baat jaise ho kisi shamshan ki

ghar se barakat is liye bhi uTh gai

qadr kar pae na dastarKHwan ki

kah nahin sakta mukammal jo ghazal

wo bhi tayyari mein hai diwan ki

main to kab ka mar chuka hun dosto

ye sada hai dafn ke e'lan ki

hum ne dekha pattharon ko TuTte

hum ne chiKHen bhi sunin chaTTan ki

'faiz' kar do kal ada qarz-e-wafa

aaKHiri tariKH hai bhugtan ki