aaankhon mein virani si hai palken bhigi baal khule

ā.ankhoñ meñ vīrānī sī hai palkeñ bhīgī baal khule

tū be-vaqt pashemāñ kyuuñ hai ham par bhī kuchh haal khule

tark-e-vafā par sochā thā hāfiz-sāhib se baat karūñ

ab Dartā huuñ jaane kaisī ulTī sīdhī faal khule

lākhoñ kā haq maar chuke ho chain kahāñ se pāoge

paidal aage sarkāo to farzīñ kī bhī chaal khule

bātoñ se to nāseh ko ham sīdhā-sāda samjhe the

vo to ik din mai-ḳhāne meñ hazrat ke ahvāl khule

fariyādoñ ne aur baḌhā dī muddat bad-unvānī kī

baazū phailāne se shāyad bandhan TūTeñ jaal khule

hastī kī is bhūl-bhulayyāñ meñ jab tham kar sochā to

ik pechīda lamhe meñ sad-bāb-e-māh-o-sāl khule

aap 'muzaffar'-hanafī se mil kar shāyad māyūs na hoñ

dil ke saaf basīrat gahrī zehan rasā a.amāl khule

aaankhon mein virani si hai palken bhigi baal khule

tu be-waqt pasheman kyun hai hum par bhi kuchh haal khule

tark-e-wafa par socha tha hafiz-sahib se baat karun

ab Darta hun jaane kaisi ulTi sidhi fal khule

lakhon ka haq mar chuke ho chain kahan se paoge

paidal aage sarkao to farzin ki bhi chaal khule

baaton se to naseh ko hum sidha-sada samjhe the

wo to ek din mai-KHane mein hazrat ke ahwal khule

fariyaadon ne aur baDha di muddat bad-unwani ki

bazu phailane se shayad bandhan TuTen jal khule

hasti ki is bhul-bhulayyan mein jab tham kar socha to

ek pechida lamhe mein sad-bab-e-mah-o-sal khule

aap 'muzaffar'-hanafi se mil kar shayad mayus na hon

dil ke saf basirat gahri zehan rasa aamal khule