aab-e-chashm aae aur nahaun main

āb-e-chashm aa.e aur nahā.ūñ maiñ

kuchh piyūñ aur kuchh bahā.ūñ maiñ

āñsuoñ kā hai intizār mujhe

paanī barse to lahlahā.ūñ maiñ

maiñ ki mazdūr-e-'ishq ḳhuuñ meñ nahā.ūñ

kyoñ pasīne meñ hī nahā.ūñ maiñ

mere marne pe log rone lage

un ke rone pe qahqahā.ūñ maiñ

ho gayā vasl jitnā honā thā

bistar-e-jism ab tahā.ūñ maiñ

vo mujhe jitnā sīdhī raah pe laa.e

aur utnā hī gumrāhūñ maiñ

saañp huuñ maiñ to ye zarā sā kyoñ

ḳhuub zahrā.ūñ azhdahā.ūñ maiñ

chāhe jitnā huuñ 'farhat-ullāh-ḳhān'

'farhat-ehsās' hī kahā.ūñ maiñ

aab-e-chashm aae aur nahaun main

kuchh piyun aur kuchh bahaun main

aansuon ka hai intizar mujhe

pani barse to lahlahaun main

main ki mazdur-e-'ishq KHun mein nahaun

kyon pasine mein hi nahaun main

mere marne pe log rone lage

un ke rone pe qahqahaun main

ho gaya wasl jitna hona tha

bistar-e-jism ab tahaun main

wo mujhe jitna sidhi rah pe lae

aur utna hi gumrahun main

sanp hun main to ye zara sa kyon

KHub zahraun azhdahaun main

chahe jitna hun 'farhat-ullah-KHan'

'farhat-ehsas' hi kahaun main