aabaad dil ke hote hi ghar nam paD gaya

ābād dil ke hote hī ghar naam paḌ gayā

dīvār kyā girī ki khañDar naam paḌ gayā

paanī thā sar se ūñchā kabhī shahr-e-chashm meñ

bārish rukī to dīda-e-tar naam paḌ gayā

baḳhshī samar ne biij ko shohrat sifāt kī

koñpal javāñ huī to shajar naam paḌ gayā

zarre ko āftāb kiyā kis ḳhayāl ne

kis naqsh-e-pā se rāhguzar naam paḌ gayā

gahrā.iyoñ se un kī na phir lauTīñ kashtiyāñ

Duube to chashm-e-tar kā bhañvar naam paḌ gayā

sūraj ke qatl-e-ām se bikhre mah-o-nujūm

ik jabr kā tulū-e-sahar naam paḌ gayā

rakkhā hai qaid gardish-e-āfāq meñ mujhe

in tang dā.eroñ kā safar naam paḌ gayā

sīpoñ kī kāvishoñ ko sarāhā na dahr ne

patthar kā jaane kaise guhar naam paḌ gayā

ḳhūn-e-jigar se paa.ī hai lafzoñ ne zindagī

ehsās bol uThā to hunar naam paḌ gayā

iz.hār-e-fan meñ ham ne kiye tajrabe na.e

āñkhoñ kī guftugū se 'nazar' naam paḌ gayā

aabaad dil ke hote hi ghar nam paD gaya

diwar kya giri ki khanDar nam paD gaya

pani tha sar se uncha kabhi shahr-e-chashm mein

barish ruki to dida-e-tar nam paD gaya

baKHshi samar ne bij ko shohrat sifat ki

konpal jawan hui to shajar nam paD gaya

zarre ko aaftab kiya kis KHayal ne

kis naqsh-e-pa se rahguzar nam paD gaya

gahraiyon se un ki na phir lauTin kashtiyan

Dube to chashm-e-tar ka bhanwar nam paD gaya

suraj ke qatl-e-am se bikhre mah-o-nujum

ek jabr ka tulu-e-sahar nam paD gaya

rakkha hai qaid gardish-e-afaq mein mujhe

in tang daeron ka safar nam paD gaya

sipon ki kawishon ko saraha na dahr ne

patthar ka jaane kaise guhar nam paD gaya

KHun-e-jigar se pai hai lafzon ne zindagi

ehsas bol uTha to hunar nam paD gaya

izhaar-e-fan mein hum ne kiye tajrabe nae

aankhon ki guftugu se 'nazar' nam paD gaya