aabaad usi se hai virana mohabbat ka

ābād usī se hai vīrāna mohabbat kā

hushyāroñ se baḌh kar hai dīvāna mohabbat kā

vo ras bharī āñkheñ haiñ mai-ḳhāna mohabbat kā

chaltā hai nigāhoñ se paimāna mohabbat kā

allāh ne baḳhshī hai kyā nashv-o-numā us ko

sau ḳhirman-e-hastī hai ik daana mohabbat kā

tum jaur-o-jafā kar lo ham mehr-o-vafā kar leñ

puurā bhī to ho jaa.e afsāna mohabbat kā

saaqī jo na de baada shikva nahīñ kar sakte

ho zarf to miltā hai paimāna mohabbat kā

jibrīl ke shah-par bhī parvāz se rah jaa.eñ

hai arsh se bhī ūñchā kāshāna mohabbat kā

us bazm kī mastī kyoñ baḌh kar na rahe 'sāqib'

maḳhmūr ne rakkhā hai paimāna mohabbat kā

aabaad usi se hai virana mohabbat ka

hushyaron se baDh kar hai diwana mohabbat ka

wo ras bhari aankhen hain mai-KHana mohabbat ka

chalta hai nigahon se paimana mohabbat ka

allah ne baKHshi hai kya nashw-o-numa us ko

sau KHirman-e-hasti hai ek dana mohabbat ka

tum jaur-o-jafa kar lo hum mehr-o-wafa kar len

pura bhi to ho jae afsana mohabbat ka

saqi jo na de baada shikwa nahin kar sakte

ho zarf to milta hai paimana mohabbat ka

jibril ke shah-par bhi parwaz se rah jaen

hai arsh se bhi uncha kashana mohabbat ka

us bazm ki masti kyon baDh kar na rahe 'saqib'

maKHmur ne rakkha hai paimana mohabbat ka