aabla-pai gawara KHastagi manzur hai

ābla-pā.ī gavārā ḳhastagī manzūr hai

pūchhnā ye hai ki manzil aur kitnī duur hai

ho vo insāñ kī ḳhudā.ī yā mashīnoñ kā nizām

zad pe istehsāl kī mazdūr thā mazdūr hai

mohtasib mahkūm hoñ hākim ho zer-e-ehtisāb

banda-parvar bas yahī islām kā dastūr hai

dekhnā aaya to nasloñ tak añdherā chhā gayā

maslahat kahtī rahī sab raushnī hai nuur hai

sarhadoñ par dushmanoñ kī fauj ghar meñ apnī fauj

saare gulshan kī fazā bārūd se māmūr hai

barchhiyoñ kī nok par ailān-e-haq sheva mirā

fikr ke ḳheme jalānā aap kā manshūr hai

shahr ke saare ujāle justujū-e-nūr meñ

raushnī kī har haqīqat aañkh se mastūr hai

zaat se ġhāfil huā tasḳhīr-e-mehr-o-māh meñ

aadmī apnī anā meñ kis qadar mahsūr hai

jurm-e-haq-goī kā hai iqrār us ko barmalā

manzil-e-dār-o-rasan kā mustahiq 'āshūr' hai

aabla-pai gawara KHastagi manzur hai

puchhna ye hai ki manzil aur kitni dur hai

ho wo insan ki KHudai ya mashinon ka nizam

zad pe istehsal ki mazdur tha mazdur hai

mohtasib mahkum hon hakim ho zer-e-ehtisab

banda-parwar bas yahi islam ka dastur hai

dekhna aaya to naslon tak andhera chha gaya

maslahat kahti rahi sab raushni hai nur hai

sarhadon par dushmanon ki fauj ghar mein apni fauj

sare gulshan ki faza barud se mamur hai

barchhiyon ki nok par ailan-e-haq shewa mera

fikr ke KHeme jalana aap ka manshur hai

shahr ke sare ujale justuju-e-nur mein

raushni ki har haqiqat aankh se mastur hai

zat se ghafil hua tasKHir-e-mehr-o-mah mein

aadmi apni ana mein kis qadar mahsur hai

jurm-e-haq-goi ka hai iqrar us ko barmala

manzil-e-dar-o-rasan ka mustahiq 'ashur' hai