aadab-e-junun ahl-e-nazar bhul gae hain

ādāb-e-junūñ ahl-e-nazar bhuul ga.e haiñ

jiite to haiñ jiine kā hunar bhuul ga.e haiñ

kyā ahl-e-safar zauq-e-safar bhuul ga.e haiñ

raste meñ haiñ manzil kī ḳhabar bhuul ga.e haiñ

ġham bhuul ga.e ġham kā asar bhuul ga.e haiñ

tum kyā mile ham ḳhud ko magar bhuul ga.e haiñ

hijrat ke azāboñ meñ basar aisī huī hai

ik umr se ham apnā nagar bhuul ga.e haiñ

duniyā ke ġham apnoñ ke sitam vaqt ke tevar

kyā kyā na mire dīda-e-tar bhuul ga.e haiñ

tūfāñ pe hī rakhte haiñ nazar ahl-e-zamāna

maujoñ kī siyāsat ko magar bhuul ga.e haiñ

vo garmī-e-hālāt na zehnoñ meñ vo halchal

kyā hādse aanā hī idhar bhuul ga.e haiñ

kyā baat thī qātil se jo mansūb huī thī

maqtal meñ jhukā.e hue sar bhuul ga.e haiñ

gulshan kī fazāoñ meñ ghuTan aa ga.ī kitnī

hañsne kī adā tak gul-e-tar bhuul ga.e haiñ

jo Daal rahe the kabhī sūraj pe kamandeñ

vo log ujāloñ kā safar bhuul ga.e haiñ

āġhāz-e-safar apnā kiyā ham ne jahāñ se

ham rakh ke vahīñ zād-e-safar bhuul ga.e haiñ

tum aglī sharāfat kā sabaq phir se paḌhānā

is daur ke insān agar bhuul ga.e haiñ

'ārif' maiñ gila kis se karūñ be-asarī kā

tāle.a hī mire bāb-e-asar bhuul ga.e haiñ

aadab-e-junun ahl-e-nazar bhul gae hain

jite to hain jine ka hunar bhul gae hain

kya ahl-e-safar zauq-e-safar bhul gae hain

raste mein hain manzil ki KHabar bhul gae hain

gham bhul gae gham ka asar bhul gae hain

tum kya mile hum KHud ko magar bhul gae hain

hijrat ke azabon mein basar aisi hui hai

ek umr se hum apna nagar bhul gae hain

duniya ke gham apnon ke sitam waqt ke tewar

kya kya na mere dida-e-tar bhul gae hain

tufan pe hi rakhte hain nazar ahl-e-zamana

maujon ki siyasat ko magar bhul gae hain

wo garmi-e-haalat na zehnon mein wo halchal

kya hadse aana hi idhar bhul gae hain

kya baat thi qatil se jo mansub hui thi

maqtal mein jhukae hue sar bhul gae hain

gulshan ki fazaon mein ghuTan aa gai kitni

hansne ki ada tak gul-e-tar bhul gae hain

jo Dal rahe the kabhi suraj pe kamanden

wo log ujalon ka safar bhul gae hain

aaghaz-e-safar apna kiya hum ne jahan se

hum rakh ke wahin zad-e-safar bhul gae hain

tum agli sharafat ka sabaq phir se paDhana

is daur ke insan agar bhul gae hain

'arif' main gila kis se karun be-asari ka

talea hi mere bab-e-asar bhul gae hain