aadamiyyat ki kami aaj jis insan mein hai

ādamiyyat kī kamī aaj jis insān meñ hai

vo na hindū meñ hai shāmil na musalmān meñ hai

zindagānī kā umañDtā huā ye sail-e-ravāñ

jo safīna hai talātum meñ hai tūfān meñ hai

is zamāne ke masā.il kā sulajhnā ma.alūm

ziist uljhī huī ḳhud apne garebān meñ hai

amn-o-tahzīb pe hai maut kā aalam taarī

dekhiye jis ko vahī jang ke maidān meñ hai

haram-o-dair kī tasvīr-e-mujassam huuñ maiñ

kufr kā rang bhī shāmil mire īmān meñ hai

is haqīqat kā nahīñ saare zamāne meñ javāb

jo haqīqat mire afsāne ke unvān meñ hai

jo bhī paḌhtā hai vahī dād-e-suḳhan detā hai

koī tāsīr to 'jauhar' tire dīvān meñ hai

aadamiyyat ki kami aaj jis insan mein hai

wo na hindu mein hai shamil na musalman mein hai

zindagani ka umanDta hua ye sail-e-rawan

jo safina hai talatum mein hai tufan mein hai

is zamane ke masail ka sulajhna malum

zist uljhi hui KHud apne gareban mein hai

amn-o-tahzib pe hai maut ka aalam tari

dekhiye jis ko wahi jang ke maidan mein hai

haram-o-dair ki taswir-e-mujassam hun main

kufr ka rang bhi shamil mere iman mein hai

is haqiqat ka nahin sare zamane mein jawab

jo haqiqat mere afsane ke unwan mein hai

jo bhi paDhta hai wahi dad-e-suKHan deta hai

koi tasir to 'jauhar' tere diwan mein hai