aadmi insan se haiwan kaise ho gaya

aadmī insān se haivān kaise ho gayā

ek zinda mulk qabristān kaise ho gayā

aag dene vaale hī aa.e haiñ mujh se pūchhne

ek pal meñ shahr ye vīrān kaise ho gayā

kaun hai vo mere haq meñ jo duā.eñ kartā hai

saḳht mushkil marhala āsān kaise ho gayā

us ne sach kahne kī khaa.ī thī qasam har haal meñ

din kā sūraj raat kā mehmān kaise ho gayā

yuuñ to kahne ko yahāñ gangā bhī hai jamunā bhī hai

nazr-e-ātish phir ye hindostān kaise ho gayā

zehn meñ jo nāchtī hai ek kiran be-nām sī

band kamre meñ ye raushan-dān kaise ho gayā

vaise 'nusrat' paa.ī thī virse meñ teġh-e-be-niyām

ḳhauf aisī qaum kā unvān kaise ho gayā

aadmi insan se haiwan kaise ho gaya

ek zinda mulk qabristan kaise ho gaya

aag dene wale hi aae hain mujh se puchhne

ek pal mein shahr ye viran kaise ho gaya

kaun hai wo mere haq mein jo duaen karta hai

saKHt mushkil marhala aasan kaise ho gaya

us ne sach kahne ki khai thi qasam har haal mein

din ka suraj raat ka mehman kaise ho gaya

yun to kahne ko yahan ganga bhi hai jamuna bhi hai

nazr-e-atish phir ye hindostan kaise ho gaya

zehn mein jo nachti hai ek kiran be-nam si

band kamre mein ye raushan-dan kaise ho gaya

waise 'nusrat' pai thi wirse mein tegh-e-be-niyam

KHauf aisi qaum ka unwan kaise ho gaya