aadmi ke dard ka is tarah darman kijiye

aadmī ke dard kā is tarah darmāñ kījiye

asl īmāñ māvarā-e-kufr-o-īmāñ kījiye

merī ḳhākistar meñ baaqī hai jo bū-e-āshiyāñ

bijliyoñ kā zikr kyā fikr-e-gulistāñ kījiye

gar kamāl-e-zauq-e-gulshan bū-e-gul banñe meñ hai

zarra zarra ḳhaak kā apnī gulistāñ kījiye

gar faroġh-e-zindagī ḳhud ko miTā dene meñ hai

zauq-e-ḳhud-bīnī miTā kar fikr-e-insāñ kījiye

apne armānoñ kī duniyā meñ to duniyā rah chukī

jis meñ duniyā hī simaT aa.e vo armāñ kījiye

apne ġham ko rote rahnā lā.eq-e-insāñ nahīñ

gāhe-gāhe dūsroñ ke ġham kā farmāñ kījiye

zauq-e-tausī.a-e-mohabbat kā hai aalam muntazir

dard-e-ālam hī ko apnā monis-e-jāñ kījiye

lutf-e-hastī ḳhāk-e-mai-ḳhāna hī ban jaane meñ hai

ḳhud ko misl-e-ḳhāk-e-pāk-e-pā-e-rindāñ kījiye

ālam-e-imkāñ meñ ho 'anvar' nayā aalam bapā

dūsroñ ke vāste gar ḳhud ko qurbāñ kījiye

aadmi ke dard ka is tarah darman kijiye

asl iman mawara-e-kufr-o-iman kijiye

meri KHakistar mein baqi hai jo bu-e-ashiyan

bijliyon ka zikr kya fikr-e-gulistan kijiye

gar kamal-e-zauq-e-gulshan bu-e-gul banne mein hai

zarra zarra KHak ka apni gulistan kijiye

gar farogh-e-zindagi KHud ko miTa dene mein hai

zauq-e-KHud-bini miTa kar fikr-e-insan kijiye

apne armanon ki duniya mein to duniya rah chuki

jis mein duniya hi simaT aae wo arman kijiye

apne gham ko rote rahna laeq-e-insan nahin

gahe-gahe dusron ke gham ka farman kijiye

zauq-e-tausia-e-mohabbat ka hai aalam muntazir

dard-e-alam hi ko apna monis-e-jaan kijiye

lutf-e-hasti KHak-e-mai-KHana hi ban jaane mein hai

KHud ko misl-e-KHak-e-pak-e-pa-e-rindan kijiye

aalam-e-imkan mein ho 'anwar' naya aalam bapa

dusron ke waste gar KHud ko qurban kijiye