aae bhi wo to shakl dikha kar chale gae

aa.e bhī vo to shakl dikhā kar chale ga.e

dil kī lagī ko aur baḌhā kar chale ga.e

bīmār-e-ġham ke paas vo aa kar chale ga.e

bigḌī huī thī baat banā kar chale ga.e

haañ ai nigāh-e-shauq batā tū kahāñ rahī

vo gosha-e-naqāb uThā kar chale ga.e

go mai-kade meñ pī bhī rahe the janāb-e-shaiḳh

ham to yahī kaheñge ki aa kar chale ga.e

ai jazb-e-dil batā to sahī tujh ko kyā huā

kal jab vo ham se aañkh bachā kar chale ga.e

uTTheñge hashr tak na tire āstāñ se ham

nā-ahl hī vo hoñge jo aa kar chale ga.e

girne lage jo un pe bhī parvāne baar baar

vo sham-e-anjuman ko bujhā kar chale ga.e

kuchh ham-safīr ho ga.e sayyād kā shikār

kuchh ḳhud hī āshiyāñ ko jalā kar chale ga.e

āḳhir ye kū-e-ishq hai 'sāhir' sañbhal ke chal

lākhoñ yahāñ se Thokareñ khā kar chale ga.e

aae bhi wo to shakl dikha kar chale gae

dil ki lagi ko aur baDha kar chale gae

bimar-e-gham ke pas wo aa kar chale gae

bigDi hui thi baat bana kar chale gae

han ai nigah-e-shauq bata tu kahan rahi

wo gosha-e-naqab uTha kar chale gae

go mai-kade mein pi bhi rahe the janab-e-shaiKH

hum to yahi kahenge ki aa kar chale gae

ai jazb-e-dil bata to sahi tujh ko kya hua

kal jab wo hum se aankh bacha kar chale gae

uTThenge hashr tak na tere aastan se hum

na-ahl hi wo honge jo aa kar chale gae

girne lage jo un pe bhi parwane bar bar

wo sham-e-anjuman ko bujha kar chale gae

kuchh ham-safir ho gae sayyaad ka shikar

kuchh KHud hi aashiyan ko jala kar chale gae

aaKHir ye ku-e-ishq hai 'sahir' sanbhal ke chal

lakhon yahan se Thokaren kha kar chale gae