aae hum shahr-e-ghazal mein to is aaghaz ke sath

aa.e ham shahr-e-ġhazal meñ to is āġhāz ke saath

muddatoñ raqs kiyā hafiz-e-shīrāz ke saath

avval-e-ishq hai aur ham-safarī kī lazzat

aur āhista qadam aur zarā naaz ke saath

avval avval to dhanak ban ke uḌā vo taa.ir

aur phir rañg badalte ga.e parvāz ke saath

ek vīrān darīche pe ḳhizāñ kī bārish

koī tasvīr banātī rahī āvāz ke saath

maiñ vo sarshār ki thā nashsha-e-yak-ḳhvāb bahut

is ne ta.abīr bhī dī ḳhvāb ke āġhāz ke saath

hai koī vāqif-e-asrār sar-e-mai-ḳhāna

kyā ye miinā se surāhī ne kahā raaz ke saath

ham ne hī dil se ham-āhañg gulū ko rakkhā

log lai apnī badalte rahe har saaz ke saath

aae hum shahr-e-ghazal mein to is aaghaz ke sath

muddaton raqs kiya hafiz-e-shiraaz ke sath

awwal-e-ishq hai aur ham-safari ki lazzat

aur aahista qadam aur zara naz ke sath

awwal awwal to dhanak ban ke uDa wo tair

aur phir rang badalte gae parwaz ke sath

ek viran dariche pe KHizan ki barish

koi taswir banati rahi aawaz ke sath

main wo sarshaar ki tha nashsha-e-yak-KHwab bahut

is ne tabir bhi di KHwab ke aaghaz ke sath

hai koi waqif-e-asrar sar-e-mai-KHana

kya ye mina se surahi ne kaha raaz ke sath

hum ne hi dil se ham-ahang gulu ko rakkha

log lai apni badalte rahe har saz ke sath