aafrin waqt-e-tasawwur aah ki tasir ko

āfrīñ vaqt-e-tasavvur aah kī tāsīr ko

karvaTeñ lākhoñ badalvā.īñ tirī tasvīr ko

dekh o nāvak-fagan shauq-e-dam-e-naḳhchīr ko

hasrat-e-zaḳhm-e-jigar khā khā ga.ī hai tiir ko

samjho dastāvez zaḳhm-e-āshiq-e-dil-gīr ko

kab miTā sakte ho apne haath kī tahrīr ko

zulf ke mazmūñ se hai har baat meñ pechīdgī

tum hī suljhāo mirī uljhī huī taqrīr ko

ain ġhaflat thī ki mar kar bhī na kuchh hāsil huā

zindagī samjhe hue the ḳhvāb-e-be-ta.abīr ko

kyā na hogā ḳhuuñ bahā dene meñ bhī ḳhauf-e-ḳhudā

hashr ke din kyā karoge rang kī taġh.yīr ko

vo suñghā kar zulf-e-mushkīñ hosh meñ laa.e mujhe

saañp ne chūsā hai apne zahr kī tāsīr ko

maut kā aanā muqaddam hai bashar ke vāste

aur maiñ kuchh kah nahīñ saktā tirī tāḳhīr ko

ho kashish thoḌī agar phir auj-o-pastī kuchh nahīñ

zarre ne khīñchā hai kitnā mehr kī tanvīr ko

maiñ vo vābista-e-sahrā huuñ ki gar roke mujhe

jeb meñ rakh luuñ uThā kar ḳhār-e-dāman-gīr ko

aap kī hai nek-nāmī aur mirī bad-nāmiyāñ

aap kī shohrat se kyā nisbat mirī tash.hīr ko

zulf ke phandoñ ko kholo phir dam-e-'sho.ala' rukā

kyoñ gale meñ ghoñTte ho jān-e-be-taqsīr ko

aafrin waqt-e-tasawwur aah ki tasir ko

karwaTen lakhon badalwain teri taswir ko

dekh o nawak-fagan shauq-e-dam-e-naKHchir ko

hasrat-e-zaKHm-e-jigar kha kha gai hai tir ko

samjho dastawez zaKHm-e-ashiq-e-dil-gir ko

kab miTa sakte ho apne hath ki tahrir ko

zulf ke mazmun se hai har baat mein pechidgi

tum hi suljhao meri uljhi hui taqrir ko

ain ghaflat thi ki mar kar bhi na kuchh hasil hua

zindagi samjhe hue the KHwab-e-be-tabir ko

kya na hoga KHun baha dene mein bhi KHauf-e-KHuda

hashr ke din kya karoge rang ki taghyir ko

wo sungha kar zulf-e-mushkin hosh mein lae mujhe

sanp ne chusa hai apne zahr ki tasir ko

maut ka aana muqaddam hai bashar ke waste

aur main kuchh kah nahin sakta teri taKHir ko

ho kashish thoDi agar phir auj-o-pasti kuchh nahin

zarre ne khincha hai kitna mehr ki tanwir ko

main wo wabista-e-sahra hun ki gar roke mujhe

jeb mein rakh lun uTha kar KHar-e-daman-gir ko

aap ki hai nek-nami aur meri bad-namiyan

aap ki shohrat se kya nisbat meri tashhir ko

zulf ke phandon ko kholo phir dam-e-'shoala' ruka

kyon gale mein ghonTte ho jaan-e-be-taqsir ko