aag jab zaKHm-e-jigar be-intiha dene lage

aag jab zaḳhm-e-jigar be-intihā dene lage

chāra-gar ghabrā ke uf uf kī sadā dene lage

ab kahāñ thā maiñ jo detā is mohabbat kā javāb

jis kī turbat dekh lī mujh ko sadā dene lage

dāman-e-sabr-o-tahammul haath se ḳhud chhuT gayā

TuuT kar zaḳhmoñ ke Tāñke jab sadā dene lage

hijr kī rātoñ ke sannāTe meñ uf rī be-ḳhudī

ham dil-e-gum-gashta ko apnī sadā dene lage

haath bhī ghabrā ke maiñ ne qalb-e-nāzuk par rakhe

jab zarā sī choT meñ shīshe sadā dene lage

jāñkanī kā vaqt bhī baaqī rahe tum bhī raho

dekhne aa.e to kyā achchhī daġhā dene lage

mai-kade meñ ham se mastoñ kī ḳhushī kyā rañj kyā

mil ga.e do-chār sāġhar aur duā dene lage

munhasir marne pe ho jab sūrat-e-taskīn-e-dil

kosnā maiñ is ko samjhūñ jo duā dene lage

zālim-o-mazlūm kā mahfil meñ kal niklā thā zikr

vo hamārā aur ham un kā patā dene lage

marne vaale phir na ai 'jāved' kholeñ apnī aañkh

gar qasam baḌhtī huī un kī hayā dene lage

aag jab zaKHm-e-jigar be-intiha dene lage

chaara-gar ghabra ke uf uf ki sada dene lage

ab kahan tha main jo deta is mohabbat ka jawab

jis ki turbat dekh li mujh ko sada dene lage

daman-e-sabr-o-tahammul hath se KHud chhuT gaya

TuT kar zaKHmon ke Tanke jab sada dene lage

hijr ki raaton ke sannaTe mein uf ri be-KHudi

hum dil-e-gum-gashta ko apni sada dene lage

hath bhi ghabra ke main ne qalb-e-nazuk par rakhe

jab zara si choT mein shishe sada dene lage

jaankani ka waqt bhi baqi rahe tum bhi raho

dekhne aae to kya achchhi dagha dene lage

mai-kade mein hum se maston ki KHushi kya ranj kya

mil gae do-chaar saghar aur dua dene lage

munhasir marne pe ho jab surat-e-taskin-e-dil

kosna main is ko samjhun jo dua dene lage

zalim-o-mazlum ka mahfil mein kal nikla tha zikr

wo hamara aur hum un ka pata dene lage

marne wale phir na ai 'jawed' kholen apni aankh

gar qasam baDhti hui un ki haya dene lage