aag kya sard hui barf ko pani kar ke

aag kyā sard huī barf ko paanī kar ke

ham bhī dariyā hue mahsūs ravānī kar ke

pūchhiye kis se ki vīrān hue ghar kaise

har koī ḳhush hai yahāñ naql-e-makānī kar ke

in ishāroñ kī kanāyoñ kī haqīqat ma.alūm

ham ne alfāz ko dekhā thā ma.ānī kar ke

ik na.e din kī shurūāt huī jaatī hai

qāflo aage baḌho ḳhatm kahānī kar ke

log rakhte haiñ zarā.at se zamīneñ ḳhush-rañg

ham bhī dekheñ kisī poshāk ko dhānī kar ke

qadr-o-qīmat meñ izāfe kī talab thī jin ko

vahī masrūr haiñ ashiyā kī girānī kar ke

yuuñ hī karte rahe jiddat kā gila to 'rāhat'

har kisī chiiz ko rakh doge purānī kar ke

aag kya sard hui barf ko pani kar ke

hum bhi dariya hue mahsus rawani kar ke

puchhiye kis se ki viran hue ghar kaise

har koi KHush hai yahan naql-e-makani kar ke

in ishaaron ki kanayon ki haqiqat malum

hum ne alfaz ko dekha tha maani kar ke

ek nae din ki shuruat hui jati hai

qaflo aage baDho KHatm kahani kar ke

log rakhte hain zaraat se zaminen KHush-rang

hum bhi dekhen kisi poshak ko dhani kar ke

qadr-o-qimat mein izafe ki talab thi jin ko

wahi masrur hain ashiya ki girani kar ke

yun hi karte rahe jiddat ka gila to 'rahat'

har kisi chiz ko rakh doge purani kar ke