aag mein birha ki yun birhan jale

aag meñ birhā kī yuuñ birhan jale

āñsuoñ kī aañch se dāman jale

aag chāhat kī bhī kaisī aag hai

raushnī chehre pe ho aur man jale

pyaar kar ke yuuñ chale ik kāminī

jog le kar jaise bairāgan jale

kāmnā.eñ bhasm hoñ āshā.eñ raakh

man jale to man kā har bandhan jale

naam rakkhe kyā koī is aag kā

raat din jis aag meñ jīvan jale

dekh kar be-rūp mere ruup ko

thaal meñ sindūr aur chandan jale

vo lagā kar chal diye birhā kī aag

ab kisī kā tan jale yā man jale

aag birhā kī anokhī aag hai

chāñdnī kī chhāñv meñ āñgan jale

laaj rakh lī hai piyā ne pyaar kī

laakh jaltī hai koī bairan jale

ban ke dīpak aur kabhī ban kar patang

bāñvare man ham tire kāran jale

sāmne aaya hai qismat kā likhā

ab to mukhḌā dekh kar darpan jale

jalne vaalā hī samajhtā hai 'tufail'

kaun kis ke ġham meñ kis kāran jale

aag mein birha ki yun birhan jale

aansuon ki aanch se daman jale

aag chahat ki bhi kaisi aag hai

raushni chehre pe ho aur man jale

pyar kar ke yun chale ek kaamini

jog le kar jaise bairagan jale

kaamnaen bhasm hon aashaen rakh

man jale to man ka har bandhan jale

nam rakkhe kya koi is aag ka

raat din jis aag mein jiwan jale

dekh kar be-rup mere rup ko

thaal mein sindur aur chandan jale

wo laga kar chal diye birha ki aag

ab kisi ka tan jale ya man jale

aag birha ki anokhi aag hai

chandni ki chhanw mein aangan jale

laj rakh li hai piya ne pyar ki

lakh jalti hai koi bairan jale

ban ke dipak aur kabhi ban kar patang

banware man hum tere karan jale

samne aaya hai qismat ka likha

ab to mukhDa dekh kar darpan jale

jalne wala hi samajhta hai 'tufail'

kaun kis ke gham mein kis karan jale