aaghaz-e-mohabbat hi mein nashad karoge

āġhāz-e-mohabbat hī meñ nāshād karoge

kyā mujh ko ḳhabar thī mujhe barbād karoge

muddat se hai vīrān mirā gulshan-e-hastī

kab phuul koī hoñToñ se irshād karoge

hai vaqt kī āġhosh meñ ik aisā zamāna

jab rātoñ ko uTh uTh ke mujhe yaad karoge

ḳhvāboñ ke darīchoñ se mujhe jhāñkne vaalo

kab ujḌī huī ḳhalvateñ ābād karoge

insān ko bekār sī shai jānñe vaalo

sāyoñ se lipaT kar kabhī fariyād karoge

kam-zarf-e-mohabbat bhī haiñ bedād ke tālib

kyā aur bhī arzānī-e-bedād karoge

ye zikr hai 'altāf' anāsir se shab-o-roz

kab qaidī-e-anfās ko āzād karoge

aaghaz-e-mohabbat hi mein nashad karoge

kya mujh ko KHabar thi mujhe barbaad karoge

muddat se hai viran mera gulshan-e-hasti

kab phul koi honTon se irshad karoge

hai waqt ki aaghosh mein ek aisa zamana

jab raaton ko uTh uTh ke mujhe yaad karoge

KHwabon ke darichon se mujhe jhankne walo

kab ujDi hui KHalwaten aabaad karoge

insan ko bekar si shai jaanne walo

sayon se lipaT kar kabhi fariyaad karoge

kam-zarf-e-mohabbat bhi hain bedad ke talib

kya aur bhi arzani-e-bedad karoge

ye zikr hai 'altaf' anasir se shab-o-roz

kab qaidi-e-anfas ko aazad karoge