aagahi maut se kam bhi nahin ruswa bhi nahin

āgahī maut se kam bhī nahīñ rusvā bhī nahīñ

dekhtā huuñ vo tamāshā jo tamāshā bhī nahīñ

jalva mushtāq bhī huuñ jalva taqāzā bhī nahīñ

husn majrūh-e-nazar ho ye gavārā bhī nahīñ

zindagī ham ko bahut der meñ raas aa.ī hai

dard kam bhī nahīñ imkān-e-mudāvā bhī nahīñ

raah paatā hai zamāna mirī gumrāhī se

manzileñ kyā mire aage koī rasta bhī nahīñ

ba.az vaqtoñ ke ḳhayālāt bhī kyā hote haiñ

duur tak jaise maiñ tanhā bhī huuñ tanhā bhī nahīñ

sābiqa aise sitamgar se hai din raat apnā

ya.anī qātil bhī nahīñ vo to masīhā bhī nahīñ

raushnī miltī hai duniyā ko unhī logoñ se

jin ke hisse meñ charāġhoñ kā ujālā bhī nahīñ

apne hī shahr meñ ab apne shanāsā kam haiñ

dasht-e-ġhurbat meñ ajab kyā jo shanāsā bhī nahīñ

har tabāhī kā sabab hai dil-e-muztar tanhā

ġham hazār āfat-e-jāñ hai magar itnā bhī nahīñ

haq rifāqat kā adā kar diyā shāyad us ne

dil gulistāñ bhī nahīñ dard kā sahrā bhī nahīñ

mashvare dete haiñ ahbāb mujhe 'shauq' aise

jaise ab tak mujhe andāza ḳhud apnā bhī nahīñ

aagahi maut se kam bhi nahin ruswa bhi nahin

dekhta hun wo tamasha jo tamasha bhi nahin

jalwa mushtaq bhi hun jalwa taqaza bhi nahin

husn majruh-e-nazar ho ye gawara bhi nahin

zindagi hum ko bahut der mein ras aai hai

dard kam bhi nahin imkan-e-mudawa bhi nahin

rah pata hai zamana meri gumrahi se

manzilen kya mere aage koi rasta bhi nahin

baz waqton ke KHayalat bhi kya hote hain

dur tak jaise main tanha bhi hun tanha bhi nahin

sabiqa aise sitamgar se hai din raat apna

yani qatil bhi nahin wo to masiha bhi nahin

raushni milti hai duniya ko unhi logon se

jin ke hisse mein charaghon ka ujala bhi nahin

apne hi shahr mein ab apne shanasa kam hain

dasht-e-ghurbat mein ajab kya jo shanasa bhi nahin

har tabahi ka sabab hai dil-e-muztar tanha

gham hazar aafat-e-jaan hai magar itna bhi nahin

haq rifaqat ka ada kar diya shayad us ne

dil gulistan bhi nahin dard ka sahra bhi nahin

mashware dete hain ahbab mujhe 'shauq' aise

jaise ab tak mujhe andaza KHud apna bhi nahin