aage ye gareban na kabhi chaak karunga

aage ye garebāñ na kabhī chaak karūñgā

vahshat se tire dasht ko ab paak karūñgā

jis din bhī huā tez mirā sho'la-e-zulmat

us din varaq-e-mahr tujhe ḳhaak karūñgā

shab us ke liye masnad-e-mahtāb bichhā kar

tāroñ kā tamāshā tah-e-aflāk karūñgā

us ko bhī banā.ūñgā ḳhush-āmoz talātum

aur ḳhud ko bhī ḳhaar o ḳhas-o-ḳhāshāk karūñgā

dekhūñgā abhī aur bhī ḳhanjar kī ravānī

qātil ko abhī aur bhī saffāk karūñgā

bal khāte hue jism pe ik zaḳhm lagā kar

is nār-e-mohabbat ko ġhazabnāk karūñgā

dauḌ āye.gā vo āhū-e-chālāk kahāñ tak

ik din to use basta-e-fitrāk karūñgā

pahle to karūñgā maiñ tirī ātish-e-ḳhūñ tez

phir farsh-e-badan par tujhe bebāk karūñgā

aage ye gareban na kabhi chaak karunga

wahshat se tere dasht ko ab pak karunga

jis din bhi hua tez mera sho'la-e-zulmat

us din waraq-e-mahr tujhe KHak karunga

shab us ke liye masnad-e-mahtab bichha kar

taron ka tamasha tah-e-aflak karunga

us ko bhi banaunga KHush-amoz talatum

aur KHud ko bhi KHar o KHas-o-KHashak karunga

dekhunga abhi aur bhi KHanjar ki rawani

qatil ko abhi aur bhi saffak karunga

bal khate hue jism pe ek zaKHm laga kar

is nar-e-mohabbat ko ghazabnak karunga

dauD aayega wo aahu-e-chaalak kahan tak

ek din to use basta-e-fitrak karunga

pahle to karunga main teri aatish-e-KHun tez

phir farsh-e-badan par tujhe bebak karunga