aaghosh-e-rang-o-bu ke fasane mein kuchh nahin

āġhosh-e-rañg-o-bū ke fasāne meñ kuchh nahīñ

hasrat nikal ga.ī to zamāne meñ kuchh nahīñ

māyūsiyoñ meñ husn bhī raushan nahīñ rahā

dil bujh gayā to sham.a jalāne meñ kuchh nahīñ

saaqī ke kaif-e-bāda-e-pārīna kī qasam

science ke jadīd ḳhazāne meñ kuchh nahīñ

ik husn-e-nīm-ḳhvāb kā aalam hī aur hai

soī huī adā ko jagāne meñ kuchh nahīñ

fitrat na.ī zamāna nayā zindagī na.ī

kohna ḳhudā ko pūjte jaane meñ kuchh nahīñ

terā hī ek aks thā har sū nazar-fareb

dekhā to mere ā.īna-ḳhāne meñ kuchh nahīñ

kuchh zikr-e-jām-o-shāhid-o-mai kījiye 'nushūr'

hosh o ḳhirad ke sard fasāne meñ kuchh nahīñ

aaghosh-e-rang-o-bu ke fasane mein kuchh nahin

hasrat nikal gai to zamane mein kuchh nahin

mayusiyon mein husn bhi raushan nahin raha

dil bujh gaya to shama jalane mein kuchh nahin

saqi ke kaif-e-baada-e-parina ki qasam

science ke jadid KHazane mein kuchh nahin

ek husn-e-nim-KHwab ka aalam hi aur hai

soi hui ada ko jagane mein kuchh nahin

fitrat nai zamana naya zindagi nai

kohna KHuda ko pujte jaane mein kuchh nahin

tera hi ek aks tha har su nazar-fareb

dekha to mere aaina-KHane mein kuchh nahin

kuchh zikr-e-jam-o-shahid-o-mai kijiye 'nushur'

hosh o KHirad ke sard fasane mein kuchh nahin