aaghosh ka haz paikar-o-diba ne uThaya

āġhosh kā haz paikar-o-dībā ne uThāyā

bose kā mazā sāġhar-e-sahbā ne uThāyā

kis ke dil-e-mahzūñ ko satāyā thā ki ik umr

ḳhajlat se na sar zulf-e-chalīpā ne uThāyā

shāyad mah-e-kan.ān kī nazar aa ga.ī tasvīr

kahnā hai abas ranj zuleḳhā ne uThāyā

zālim chaman-ārā ko hai gulchīñ kī ijāzat

kyoñ shor abas bulbul-e-shaidā ne uThāyā

thā ḳhauf-e-ḳhudā dushman-e-ḳhuñḳhār ke dil meñ

beḌā mirī iizā kā ahibbā ne uThāyā

hañstī thī khaḌī saikḌoñ saf roz-e-qayāmat

sar ḳhaak se jis dam tire rusvā ne uThāyā

aġhyār kā muñh thā mujhe mahfil se uThāte

sach yuuñ hai tirī ranjish-e-bejā ne uThāyā

ai dost tire dil meñ kabhī rahm na aaya

sau baar mujhe ḳhaak se aadā ne uThāyā

bīmār-e-mohabbat ko ab allāh shifā de

sunte haiñ ki haath us se masīhā ne uThāyā

āmīñ kī sadā hazrat-e-izzat meñ hai har-sū

kyā dast-e-duā āshiq-e-shaidā ne uThāyā

hai qadr suḳhan-go ki pas-e-marg 'shahīdī'

tābūt mirā dosh pe 'saudā' ne uThāyā

aaghosh ka haz paikar-o-diba ne uThaya

bose ka maza saghar-e-sahba ne uThaya

kis ke dil-e-mahzun ko sataya tha ki ek umr

KHajlat se na sar zulf-e-chalipa ne uThaya

shayad mah-e-kanan ki nazar aa gai taswir

kahna hai abas ranj zuleKHa ne uThaya

zalim chaman-ara ko hai gulchin ki ijazat

kyon shor abas bulbul-e-shaida ne uThaya

tha KHauf-e-KHuda dushman-e-KHunKHar ke dil mein

beDa meri iza ka ahibba ne uThaya

hansti thi khaDi saikDon saf roz-e-qayamat

sar KHak se jis dam tere ruswa ne uThaya

aghyar ka munh tha mujhe mahfil se uThate

sach yun hai teri ranjish-e-beja ne uThaya

ai dost tere dil mein kabhi rahm na aaya

sau bar mujhe KHak se aada ne uThaya

bimar-e-mohabbat ko ab allah shifa de

sunte hain ki hath us se masiha ne uThaya

aamin ki sada hazrat-e-izzat mein hai har-su

kya dast-e-dua aashiq-e-shaida ne uThaya

hai qadr suKHan-go ki pas-e-marg 'shahidi'

tabut mera dosh pe 'sauda' ne uThaya