aah bharne ke liye zaKHm-e-jigar bhi chahiye

aah bharne ke liye zaḳhm-e-jigar bhī chāhiye

nāla-o-fariyād meñ to chashm-e-tar bhī chāhiye

khel ye jiinā nahīñ hotā hai mere dosto

is kī ḳhātir hausla bhī dil jigar bhī chāhiye

kyoñ raheñ ban kar zamāne kī lakīroñ ke faqīr

apne jiine kā to andāz-e-digar bhī chāhiye

muflisoñ ke vāste jiinā bahut dushvār hai

zar-parastoñ se agar bachnā ho zar bhī chāhiye

zāhirī saj-dhaj kī dīvānī hai ye duniyā bahut

fasionable ḳhud ho to aisā hī ghar bhī chāhiye

shā'irī kā to nahīñ maqsad ki ho bas shā'irī

is kā ta.amīrī koī nuqta-e-nazar bhī chāhiye

tīra-baḳhtī kā ba-juz is ke nahīñ koī 'ilāj

shām-e-ġham aa.e to ummīd-e-sahar bhī chāhiye

yuuñ ilāj-e-dard-e-dil kā fā.eda kyā ai tabīb

koī nusḳha is kī ḳhātir kārgar bhī chāhiye

dahr meñ insāniyat kī sar-bulandī ke liye

pahle apne aap meñ is kā asar bhī chāhiye

dostī ke vāste merī faqat ik shart hai

dost dil kā saaf ho jo be-zarar bhī chāhiye

roTī kapḌā aur makāñ hī hājat-e-insāñ nahīñ

dūsroñ kā pyaar is ko 'umr-bhar bhī chāhiye

ḳhud-shanāsī zindagī hai ḳhud-pasandī maut hai

ai 'bashīr' is baat kī tujh ko ḳhabar bhī chāhiye

aah bharne ke liye zaKHm-e-jigar bhi chahiye

nala-o-fariyaad mein to chashm-e-tar bhi chahiye

khel ye jina nahin hota hai mere dosto

is ki KHatir hausla bhi dil jigar bhi chahiye

kyon rahen ban kar zamane ki lakiron ke faqir

apne jine ka to andaz-e-digar bhi chahiye

muflison ke waste jina bahut dushwar hai

zar-paraston se agar bachna ho zar bhi chahiye

zahiri saj-dhaj ki diwani hai ye duniya bahut

fasionable KHud ho to aisa hi ghar bhi chahiye

sha'iri ka to nahin maqsad ki ho bas sha'iri

is ka tamiri koi nuqta-e-nazar bhi chahiye

tira-baKHti ka ba-juz is ke nahin koi 'ilaj

sham-e-gham aae to ummid-e-sahar bhi chahiye

yun ilaj-e-dard-e-dil ka faeda kya ai tabib

koi nusKHa is ki KHatir kargar bhi chahiye

dahr mein insaniyat ki sar-bulandi ke liye

pahle apne aap mein is ka asar bhi chahiye

dosti ke waste meri faqat ek shart hai

dost dil ka saf ho jo be-zarar bhi chahiye

roTi kapDa aur makan hi hajat-e-insan nahin

dusron ka pyar is ko 'umr-bhar bhi chahiye

KHud-shanasi zindagi hai KHud-pasandi maut hai

ai 'bashir' is baat ki tujh ko KHabar bhi chahiye