aah bharta hun to bharne bhi nahin deta hai

aah bhartā huuñ to bharne bhī nahīñ detā hai

aur vo ḳhāmoshī se marne bhī nahīñ detā hai

nāḳhudā kashtī ko sāhil se lagātā bhī nahīñ

beach dariyā meñ utarne bhī nahīñ detā hai

dūsrā zaḳhm lagā detā hai dil par mere

pahle ko Thiik se bharne bhī nahīñ detā hai

mere āñsuoñ se vo sañg pighaltā bhī nahīñ

sar paTak kar mujhe marne bhī nahīñ detā hai

baaz aatā bhī nahīñ zarb lagāne se vo

TuuT kar mujh ko bikharne bhī nahīñ detā hai

mere sapnoñ ko vo sach bhī nahīñ hone detā

magar ummīd ko marne bhī nahīñ detā hai

aa.ine ko mire chehre se shikāyat hai bahut

aa.ina mujh ko sañvarne bhī nahīñ detā hai

us kī mahfil meñ pahuñchne kī tamannā mat kar

vo to kūche se guzarne bhī nahīñ detā hai

aah bharta hun to bharne bhi nahin deta hai

aur wo KHamoshi se marne bhi nahin deta hai

naKHuda kashti ko sahil se lagata bhi nahin

beach dariya mein utarne bhi nahin deta hai

dusra zaKHm laga deta hai dil par mere

pahle ko Thik se bharne bhi nahin deta hai

mere aansuon se wo sang pighalta bhi nahin

sar paTak kar mujhe marne bhi nahin deta hai

baz aata bhi nahin zarb lagane se wo

TuT kar mujh ko bikharne bhi nahin deta hai

mere sapnon ko wo sach bhi nahin hone deta

magar ummid ko marne bhi nahin deta hai

aaine ko mere chehre se shikayat hai bahut

aaina mujh ko sanwarne bhi nahin deta hai

us ki mahfil mein pahunchne ki tamanna mat kar

wo to kuche se guzarne bhi nahin deta hai