aah ko mail-e-guftar karun ya na karun

aah ko mā.il-e-guftār karūñ yā na karūñ

un se kuchh shikva-e-āzār karūñ yā na karūñ

āñkheñ apnī haiñ ye haath apne haiñ muñh apnā hai

hai haqīqat magar iqrār karūñ yā na karūñ

phir musībat meñ vo āvāz agar deñ mujh ko

dil batā tū hī ki inkār karūñ yā na karūñ

ḳhaas hai mere liye un ke junūñ kī Thokar

aise ehsān kā iqrār karūñ yā na karūñ

ab to ḳhud apnī firāsat se huuñ maiñ bhī mashkūk

ham-navāoñ maiñ ye iz.hār karūñ yā na karūñ

yahī nākāmiyāñ qismat meñ likhī haiñ yā-rab

apnī taqdīr se paikār karūñ yā na karūñ

mere ik haath ne phūñkā hai nasheman merā

dūsre haath pe iz.hār karūñ yā na karūñ

aah ko mail-e-guftar karun ya na karun

un se kuchh shikwa-e-azar karun ya na karun

aankhen apni hain ye hath apne hain munh apna hai

hai haqiqat magar iqrar karun ya na karun

phir musibat mein wo aawaz agar den mujh ko

dil bata tu hi ki inkar karun ya na karun

KHas hai mere liye un ke junun ki Thokar

aise ehsan ka iqrar karun ya na karun

ab to KHud apni firasat se hun main bhi mashkuk

ham-nawaon main ye izhaar karun ya na karun

yahi nakaamiyan qismat mein likhi hain ya-rab

apni taqdir se paikar karun ya na karun

mere ek hath ne phunka hai nasheman mera

dusre hath pe izhaar karun ya na karun