aah mein kuchh nazar aai na asar ki surat

aah meñ kuchh nazar aa.ī na asar kī sūrat

ye vo hai naḳhl ki dekhī na samar kī sūrat

apnī āġhosh meñ vo māh-laqā shaam se hai

yā-ilāhī nazar aa.e na sahar kī sūrat

josh aaya na mire dil kī tarah se us ko

abr barsā na kabhī dīda-e-tar kī sūrat

kar diyā hai ġham-e-furqat ne mujhe zaar aisā

gum huuñ nazroñ se magar un kī kamar kī sūrat

surḳh-rū maiñ jo huā naqd-e-shahādat pā kar

rū-siyah ho ga.e aġhyār sipar kī sūrat

phir farishte na kabhī huur kī sūrat dekheñ

dekh paa.eñ jo mire rashk-e-qamar kī sūrat

phūlne phalne kī ummīd thī 'vahbī' ik din

kar diyā ishq ne ab ḳhushk shajar kī sūrat

aah mein kuchh nazar aai na asar ki surat

ye wo hai naKHl ki dekhi na samar ki surat

apni aaghosh mein wo mah-laqa sham se hai

ya-ilahi nazar aae na sahar ki surat

josh aaya na mere dil ki tarah se us ko

abr barsa na kabhi dida-e-tar ki surat

kar diya hai gham-e-furqat ne mujhe zar aisa

gum hun nazron se magar un ki kamar ki surat

surKH-ru main jo hua naqd-e-shahadat pa kar

ru-siyah ho gae aghyar sipar ki surat

phir farishte na kabhi hur ki surat dekhen

dekh paen jo mere rashk-e-qamar ki surat

phulne phalne ki ummid thi 'wahbi' ek din

kar diya ishq ne ab KHushk shajar ki surat