aah-o-nala dard-o-gham shor-e-fughan hai aaj bhi

āh-o-nāla dard-o-ġham shor-e-fuġhāñ hai aaj bhī

ya.anī har bulbul asīr-e-bāġhbāñ hai aaj bhī

haa.e tum us ko samajhte ho gulistāñ kā harīf

bijliyoñ kī zad meñ jis kā āshiyāñ hai aaj bhī

naqsh-e-āzādī jabīnoñ se numāyāñ hai magar

dāman-e-dil par ġhulāmī kā nishāñ hai aaj bhī

manzil-e-maqsūd par pahuñche haiñ sab ke qāfile

sirf merī sa.i-e-paiham rā.egāñ hai aaj bhī

us ke afsāne pe koī tabsira be-sūd hai

shādmāñ ho kar bhī jo nā-shādmāñ hai aaj bhī

tū abhī apnī haqīqat se nahīñ hai āshnā

tere qabze meñ inān-e-do-jahāñ hai aaj bhī

maiñ azal hī se samajhtā huuñ tujhe apnā 'azīz'

ye tirī fitrat ki tū dāman-kashāñ hai aaj bhī

aah-o-nala dard-o-gham shor-e-fughan hai aaj bhi

yani har bulbul asir-e-baghban hai aaj bhi

hae tum us ko samajhte ho gulistan ka harif

bijliyon ki zad mein jis ka aashiyan hai aaj bhi

naqsh-e-azadi jabinon se numayan hai magar

daman-e-dil par ghulami ka nishan hai aaj bhi

manzil-e-maqsud par pahunche hain sab ke qafile

sirf meri sai-e-paiham raegan hai aaj bhi

us ke afsane pe koi tabsira be-sud hai

shadman ho kar bhi jo na-shadman hai aaj bhi

tu abhi apni haqiqat se nahin hai aashna

tere qabze mein inan-e-do-jahan hai aaj bhi

main azal hi se samajhta hun tujhe apna 'aziz'

ye teri fitrat ki tu daman-kashan hai aaj bhi