aahon ka shisha dard ka patthar liye phira

aahoñ kā shīsha dard kā patthar liye phirā

maiñ bazm meñ ajiib sā manzar liye phirā

har ik qadam pe qatl kā ḳhatra thā dosto

maiñ apnī āstīn meñ ḳhanjar liye phirā

logoñ ko raas aa.ī thī āḳhir havas kī dhuup

be-vaj.h kyoñ maiñ pyaar kī chādar liye phirā

har pal mirī hayāt kā thā ik pahāḌ sā

apnī sadī ke bojh ko sar par liye phirā

taḳhlīq-e-nau kā jazba-e-kāmil thā apne saath

maiñ ik nigār-ḳhāna-e-āzar liye phirā

'jāmī' har ek shaḳhs thā yuuñ tishna-lab ki maiñ

shahroñ meñ āgahī kā samundar liye phirā

aahon ka shisha dard ka patthar liye phira

main bazm mein ajib sa manzar liye phira

har ek qadam pe qatl ka KHatra tha dosto

main apni aastin mein KHanjar liye phira

logon ko ras aai thi aaKHir hawas ki dhup

be-wajh kyon main pyar ki chadar liye phira

har pal meri hayat ka tha ek pahaD sa

apni sadi ke bojh ko sar par liye phira

taKHliq-e-nau ka jazba-e-kaamil tha apne sath

main ek nigar-KHana-e-azar liye phira

'jami' har ek shaKHs tha yun tishna-lab ki main

shahron mein aagahi ka samundar liye phira