aahon ke basere hain armanon ki basti hai

aahoñ ke basere haiñ armānoñ kī bastī hai

kahte haiñ jise hastī adh-suljhī pahelī hai

nāvak tirī bātoñ ke kuchh aise lage dil par

ab saañs bhī letā huuñ to ruuh nikaltī hai

aflāk pe hotā hai kis baat kā hañgāma

bādal jo garajtā hai bijlī jo taḌaptī hai

Tapkan ko vahī samjhe zaḳhmoñ se jo khelā ho

kyā jaane musībat tū jo mujh pe guzartī hai

ik jism thā jo merā vo ḳhaak huā kab kā

ik ruuh bachī thī jo ab vo bhī pighaltī hai

gardish meñ har ik shai hai kyā DhūñDh rahe haiñ sab

kyoñ vaqt phisaltā hai kyoñ umr saraktī hai

kāfir ke liye jaise duniyā hī meñ jannat ho

momin ke liye duniyā ik kāñToñ kī bastī hai

insāñ ko lubhātī hai duniyā kī hai rañgīnī

bāhar se chamaktī hai andar se jhulastī hai

jab vaqt bigaḌtā hai insān kā duniyā meñ

duniyā bhī nazar apnī ik pal meñ badaltī hai

hai kis kī harārat se taptī haiñ mirī sāñseñ

siine meñ mire jaise ik aag sulagtī hai

aflāk ugaltā hai rūhoñ ke samundar ko

'tauqīr' zamīñ sab ke jismoñ ko nigaltī hai

aahon ke basere hain armanon ki basti hai

kahte hain jise hasti adh-suljhi paheli hai

nawak teri baaton ke kuchh aise lage dil par

ab sans bhi leta hun to ruh nikalti hai

aflak pe hota hai kis baat ka hangama

baadal jo garajta hai bijli jo taDapti hai

Tapkan ko wahi samjhe zaKHmon se jo khela ho

kya jaane musibat tu jo mujh pe guzarti hai

ek jism tha jo mera wo KHak hua kab ka

ek ruh bachi thi jo ab wo bhi pighalti hai

gardish mein har ek shai hai kya DhunDh rahe hain sab

kyon waqt phisalta hai kyon umr sarakti hai

kafir ke liye jaise duniya hi mein jannat ho

momin ke liye duniya ek kanTon ki basti hai

insan ko lubhati hai duniya ki hai rangini

bahar se chamakti hai andar se jhulasti hai

jab waqt bigaDta hai insan ka duniya mein

duniya bhi nazar apni ek pal mein badalti hai

hai kis ki hararat se tapti hain meri sansen

sine mein mere jaise ek aag sulagti hai

aflak ugalta hai ruhon ke samundar ko

'tauqir' zamin sab ke jismon ko nigalti hai