aai sahar qarib to maine paDhi ghazal

aa.ī sahar qarīb to maiñ ne paḌhī ġhazal

jalne lage sitāroñ ke bujhte hue kañval

betāb hai junūñ ki ġhazal-ḳhvāniyāñ karūñ

ḳhāmosh hai ḳhirad ki nahīñ baat kā mahal

rāhoñ meñ jū-e-ḳhūñ hai ravāñ misl-e-mauj-e-mai

saaqī yaqīñ na ho to zarā mere saath chal

ham rind ḳhāk-o-ḳhūñ meñ aTe haath bhī kaTe

nikle na ai bahār tire gesuoñ ke bal

kuchh bijliyoñ kā shor hai kuchh āñdhiyoñ kā zor

dil hai maqām par to zarā baam par nikal

ab tark-e-dostī hī taqāzā hai vaqt kā

ai yār-e-chāra-sāz mirī aag meñ na jal

ai iltifāt-e-yār mujhe sochne to de

jiine kā hai maqām ki marne kā hai mahal

dil par hai aisā bojh ki khultī nahīñ zabāñ

āñdhī hai aisī tez ki jaltā nahīñ kañval

kaise diye jalā.e ġham-e-rozgār ne

kuchh aur jagmagāte ġham-e-yār ke mahal

farmān-e-shahryār kī parvā nahīñ mujhe

īmā-e-āshiqāñ ho to 'ābid' paḌhe ġhazal

aai sahar qarib to main ne paDhi ghazal

jalne lage sitaron ke bujhte hue kanwal

betab hai junun ki ghazal-KHwaniyan karun

KHamosh hai KHirad ki nahin baat ka mahal

rahon mein ju-e-KHun hai rawan misl-e-mauj-e-mai

saqi yaqin na ho to zara mere sath chal

hum rind KHak-o-KHun mein aTe hath bhi kaTe

nikle na ai bahaar tere gesuon ke bal

kuchh bijliyon ka shor hai kuchh aandhiyon ka zor

dil hai maqam par to zara baam par nikal

ab tark-e-dosti hi taqaza hai waqt ka

ai yar-e-chaara-saz meri aag mein na jal

ai iltifat-e-yar mujhe sochne to de

jine ka hai maqam ki marne ka hai mahal

dil par hai aisa bojh ki khulti nahin zaban

aandhi hai aisi tez ki jalta nahin kanwal

kaise diye jalae gham-e-rozgar ne

kuchh aur jagmagate gham-e-yar ke mahal

farman-e-shahryar ki parwa nahin mujhe

ima-e-ashiqan ho to 'abid' paDhe ghazal