aaina-e-ibrat hai mera dil bhi jigar bhi

ā.īna-e-ibrat hai mirā dil bhī jigar bhī

ik dard kī tasvīr idhar bhī hai udhar bhī

kyā tum se shikāyat mujhe qismat se gila hai

phirtā hai muqaddar to palaTtī hai nazar bhī

us ko bhī nikāl ai dil-e-pur-dāġh ke gulchīñ

kāñTā hai mire pahlū-e-ḳhālī meñ jigar bhī

bas nāla-e-dil bas mujhe ummīd nahīñ hai

muñh dekhne vāloñ meñ hai zālim ke asar bhī

milne se bhī un ke na-hove dil ko tasallī

vaslat kī masarrat bhī rahī sub.h kā Dar bhī

thāme haiñ kalejā vo mire dil ko dukhā ke

ik tiir kī tāsīr idhar bhī hai udhar bhī

hosh uḌte haiñ gum-gashtagī-e-ahl-e-adam se

is dasht-e-siyah-roz meñ anqā hai ḳhabar bhī

pis kar tire hāthoñ kī hinā jab se huā dil

ik ḳhuun kā chullū nazar aatā hai jigar bhī

TukḌe thā kalejā mirā ḳhud jaur-e-falak se

pahlū se ga.ī chhān ke dil un kī nazar bhī

tanhā.ī-e-furqat meñ koī paas na Thahrā

ruḳhsat huā āḳhir ko duāoñ se asar bhī

har ḳhauf se pahlū kā bachānā nahīñ achchhā

ai amn-talab hashr meñ kaam aa.egā Dar bhī

kyā zaḳhm-e-dil ummīd rakhe us se ki jis ne

dekhā na kabhī chāk-e-garebān-e-sahar bhī

rūdād hai kyā shahr-e-ḳhamoshāñ kī ilāhī

is baab meñ ḳhāmosh haiñ arbāb-e-ḳhabar bhī

tasvīr banā dījiye mujh ko kisī sūrat

le jā.iye pahlū se mirā dil bhī jigar bhī

sad hādsa-e-dahr kī TuuTī na ajal se

jaatī nahīñ un tak mire marne kī ḳhabar bhī

ye hukm-e-mohabbat hai ki dil us pe fidā hai

'sāqib' jise dekhā na kabhī ek nazar bhī

aaina-e-ibrat hai mera dil bhi jigar bhi

ek dard ki taswir idhar bhi hai udhar bhi

kya tum se shikayat mujhe qismat se gila hai

phirta hai muqaddar to palaTti hai nazar bhi

us ko bhi nikal ai dil-e-pur-dagh ke gulchin

kanTa hai mere pahlu-e-KHali mein jigar bhi

bas nala-e-dil bas mujhe ummid nahin hai

munh dekhne walon mein hai zalim ke asar bhi

milne se bhi un ke na-howe dil ko tasalli

waslat ki masarrat bhi rahi subh ka Dar bhi

thame hain kaleja wo mere dil ko dukha ke

ek tir ki tasir idhar bhi hai udhar bhi

hosh uDte hain gum-gashtagi-e-ahl-e-adam se

is dasht-e-siyah-roz mein anqa hai KHabar bhi

pis kar tere hathon ki hina jab se hua dil

ek KHun ka chullu nazar aata hai jigar bhi

TukDe tha kaleja mera KHud jaur-e-falak se

pahlu se gai chhan ke dil un ki nazar bhi

tanhai-e-furqat mein koi pas na Thahra

ruKHsat hua aaKHir ko duaon se asar bhi

har KHauf se pahlu ka bachana nahin achchha

ai amn-talab hashr mein kaam aaega Dar bhi

kya zaKHm-e-dil ummid rakhe us se ki jis ne

dekha na kabhi chaak-e-gareban-e-sahar bhi

rudad hai kya shahr-e-KHamoshan ki ilahi

is bab mein KHamosh hain arbab-e-KHabar bhi

taswir bana dijiye mujh ko kisi surat

le jaiye pahlu se mera dil bhi jigar bhi

sad hadsa-e-dahr ki TuTi na ajal se

jati nahin un tak mere marne ki KHabar bhi

ye hukm-e-mohabbat hai ki dil us pe fida hai

'saqib' jise dekha na kabhi ek nazar bhi