aaina hai ki hai qatil ke muqabil qatil

ā.īna hai ki hai qātil ke muqābil qātil

mujh ko ye Dar hai ki laḌ jaa.eñ na qātil qātil

khiñch ke talvār kī sūrat na gale mil qātil

is tarah mil ki mile dil se tirā dil qātil

tire hote hue kyoñ jaan karūñ nazr-e-ajal

nīm-jāñ chhoḌne se kyā tujhe hāsil qātil

dast-e-nāzuk kī tarah teġh bhī nāzuk hai bahut

tujh se āsān na hogī mirī mushkil qātil

itnī mohlat bhī na dī teġh-e-adā ne tujh ko

ki dikhātā tujhe apnā jigar-o-dil qātil

ham sū-e-manzil-e-maqsūd chale bhī jo kabhī

jaada shamshīr banā dūrī-e-manzil qātil

kushta-e-nāz se vo hashr bane eid kā din

apne 'safdar' se zarā aaj gale mil qātil

aaina hai ki hai qatil ke muqabil qatil

mujh ko ye Dar hai ki laD jaen na qatil qatil

khinch ke talwar ki surat na gale mil qatil

is tarah mil ki mile dil se tera dil qatil

tere hote hue kyon jaan karun nazr-e-ajal

nim-jaan chhoDne se kya tujhe hasil qatil

dast-e-nazuk ki tarah tegh bhi nazuk hai bahut

tujh se aasan na hogi meri mushkil qatil

itni mohlat bhi na di tegh-e-ada ne tujh ko

ki dikhata tujhe apna jigar-o-dil qatil

hum su-e-manzil-e-maqsud chale bhi jo kabhi

jada shamshir bana duri-e-manzil qatil

kushta-e-naz se wo hashr bane eid ka din

apne 'safdar' se zara aaj gale mil qatil