aaina ek KHayal ka hun shishagar nahin

ā.īna ik ḳhayāl kā huuñ shīshagar nahīñ

maiñ vo makāñ huuñ jis kā koī bām-o-dar nahīñ

kis samt jā rahā huuñ ye mujh ko ḳhabar nahīñ

maiñ jis kī huuñ talāsh meñ ye vo sahar nahīñ

aaya huuñ ajnabī kī tarah shahr-e-dard meñ

jo rahguzar milī vo tirī rahguzar nahīñ

apnī salīb-e-jāñ pe khaḌā huuñ barahna sar

ik jaam huuñ sifāl kā maiñ kūza-gar nahīñ

ik dasht-e-be-gumāñ meñ hai manzil kī justujū

ik karb-e-lā-zavāl hai jis se mafar nahīñ

tanhā.iyoñ ke zahr se be-kal hai zindagī

merā rafīq-e-shab bhī mirā ham-safar nahīñ

har shāḳh par salīb kā hotā hai ab gumāñ

be-barg har shajar hai ki jis meñ samar nahīñ

aksar ye sochtā huuñ safar kā nishāñ mile

shāyad rah-e-hayāt abhī muḳhtasar nahīñ

paanī kī buuñd ko bhī tarastī hai ye zamīñ

abr-e-bahār kā bhī yahāñ se guzar nahīñ

taa.ir kī tarah maiñ huuñ 'sabā' ab shikasta par

parvāz kī havas hai magar bāl-o-par nahīñ

aaina ek KHayal ka hun shishagar nahin

main wo makan hun jis ka koi baam-o-dar nahin

kis samt ja raha hun ye mujh ko KHabar nahin

main jis ki hun talash mein ye wo sahar nahin

aaya hun ajnabi ki tarah shahr-e-dard mein

jo rahguzar mili wo teri rahguzar nahin

apni salib-e-jaan pe khaDa hun barahna sar

ek jam hun sifal ka main kuza-gar nahin

ek dasht-e-be-guman mein hai manzil ki justuju

ek karb-e-la-zawal hai jis se mafar nahin

tanhaiyon ke zahr se be-kal hai zindagi

mera rafiq-e-shab bhi mera ham-safar nahin

har shaKH par salib ka hota hai ab guman

be-barg har shajar hai ki jis mein samar nahin

aksar ye sochta hun safar ka nishan mile

shayad rah-e-hayat abhi muKHtasar nahin

pani ki bund ko bhi tarasti hai ye zamin

abr-e-bahaar ka bhi yahan se guzar nahin

tair ki tarah main hun 'saba' ab shikasta par

parwaz ki hawas hai magar baal-o-par nahin