آئینے میں اک آئینہ کچھ اجلا کچھ دھندلا سا

آئینے میں اک آئینہ کچھ اجلا کچھ دھندلا سا

میرے آگے میرا سراپا کچھ اجلا کچھ دھندلا سا

شرط تو یہ تھی سارے منصف سچ کے علاوہ کچھ نہ لکھیں

لیکن سب نے خود کو سوچا کچھ اجلا کچھ دھندلا سا

جب بھی خود کو چھو کر دیکھا ریت کی اک دیوار لگا

جب بھی سمجھا خود کو سمجھا کچھ اجلا کچھ دھندلا سا

بارش جب من جیت نہ پائی دریا سے یاری کر لی

لمحہ لمحہ بھیگا بھیگا کچھ اجلا کچھ دھندلا سا

ایک پگھلتے دن کا سایا ایک سلگتی رات کا عکس

کس نے دیکھا جو اندر تھا کچھ اجلا کچھ دھندلا سا

اس دنیا سے کچھ نہ مانگا اس دنیا کو کچھ نہ دیا

رہا ہاتھ میں اپنا چہرا کچھ اجلا کچھ دھندلا سا

لہریں تو آئی تھیں لیکن ساحل چھو کر لوٹ گئیں

دور کوئی سایا لہرایا کچھ اجلا کچھ دھندلا سا

جانے کیسے شور نے مجھ کو بے آواز کیا پروازؔ

ہاتھوں میں ہے اب سناٹا کچھ اجلا کچھ دھندلا سا