aaine mein ek aaina kuchh ujla kuchh dhundla sa

ā.īne meñ ik ā.īna kuchh ujlā kuchh dhuñdlā sā

mere aage merā sarāpā kuchh ujlā kuchh dhuñdlā sā

shart to ye thī saare munsif sach ke alāva kuchh na likheñ

lekin sab ne ḳhud ko sochā kuchh ujlā kuchh dhuñdlā sā

jab bhī ḳhud ko chhū kar dekhā ret kī ik dīvār lagā

jab bhī samjhā ḳhud ko samjhā kuchh ujlā kuchh dhuñdlā sā

bārish jab man jiit na paa.ī dariyā se yaarī kar lī

lamha lamha bhīgā bhīgā kuchh ujlā kuchh dhuñdlā sā

ek pighalte din kā saayā ek sulagtī raat kā aks

kis ne dekhā jo andar thā kuchh ujlā kuchh dhuñdlā sā

is duniyā se kuchh na māñgā is duniyā ko kuchh na diyā

rahā haath meñ apnā chehrā kuchh ujlā kuchh dhuñdlā sā

lahreñ to aa.ī thiiñ lekin sāhil chhū kar lauT ga.iiñ

duur koī saayā lahrāyā kuchh ujlā kuchh dhuñdlā sā

jaane kaise shor ne mujh ko be-āvāz kiyā 'parvāz'

hāthoñ meñ hai ab sannāTā kuchh ujlā kuchh dhuñdlā sā

aaine mein ek aaina kuchh ujla kuchh dhundla sa

mere aage mera sarapa kuchh ujla kuchh dhundla sa

shart to ye thi sare munsif sach ke alawa kuchh na likhen

lekin sab ne KHud ko socha kuchh ujla kuchh dhundla sa

jab bhi KHud ko chhu kar dekha ret ki ek diwar laga

jab bhi samjha KHud ko samjha kuchh ujla kuchh dhundla sa

barish jab man jit na pai dariya se yari kar li

lamha lamha bhiga bhiga kuchh ujla kuchh dhundla sa

ek pighalte din ka saya ek sulagti raat ka aks

kis ne dekha jo andar tha kuchh ujla kuchh dhundla sa

is duniya se kuchh na manga is duniya ko kuchh na diya

raha hath mein apna chehra kuchh ujla kuchh dhundla sa

lahren to aai thin lekin sahil chhu kar lauT gain

dur koi saya lahraya kuchh ujla kuchh dhundla sa

jaane kaise shor ne mujh ko be-awaz kiya 'parwaz'

hathon mein hai ab sannaTa kuchh ujla kuchh dhundla sa