aaina dekh ke kahta hai ye dilbar mera

aa.ina dekh ke kahtā hai ye dilbar merā

māh-e-kan.āñ bhī nahīñ husn meñ ham-sar merā

dil-e-qātil se pas-e-qatl bhī niklā na buḳhār

lāsha tash.hīr kiyā kar ke judā sar merā

yaar phir jaatā hai aa kar mire darvāze se

mujh se bargashta hai kis darja muqaddar merā

rāh-e-gum-karda vo ḳhud phirtā hai ik muddat se

kū-e-ulfat meñ ḳhizar ḳhaak ho rahbar merā

nahīñ ma.alūm ki qāsid pe mire kyā guzrī

aaj qaabū meñ nahīñ hai dil-e-muztar merā

mai-kade par mirā qabza ho maiñ vo mai-kash huuñ

shīsha merā hai subū merā hai sāġhar merā

kyoñ lagā rahne diyā ai mire qātil tasma

ek hī vaar meñ karnā thā judā sar merā

aa.iye aa.iye dikhlā.iye sūrat apnī

dam shab-e-hijr meñ aaya hai laboñ par merā

qatl hote hue jī bhar ke unheñ dekh liyā

hausla aaj to niklā tah-e-ḳhanjar merā

ai 'vafā' thī jo tamanna mujhe pā-bosī kī

pā-e-qātil pe girā ho ke judā sar merā

aaina dekh ke kahta hai ye dilbar mera

mah-e-kanan bhi nahin husn mein ham-sar mera

dil-e-qatil se pas-e-qatl bhi nikla na buKHar

lasha tashhir kiya kar ke juda sar mera

yar phir jata hai aa kar mere darwaze se

mujh se bargashta hai kis darja muqaddar mera

rah-e-gum-karda wo KHud phirta hai ek muddat se

ku-e-ulfat mein KHizar KHak ho rahbar mera

nahin malum ki qasid pe mere kya guzri

aaj qabu mein nahin hai dil-e-muztar mera

mai-kade par mera qabza ho main wo mai-kash hun

shisha mera hai subu mera hai saghar mera

kyon laga rahne diya ai mere qatil tasma

ek hi war mein karna tha juda sar mera

aaiye aaiye dikhlaiye surat apni

dam shab-e-hijr mein aaya hai labon par mera

qatl hote hue ji bhar ke unhen dekh liya

hausla aaj to nikla tah-e-KHanjar mera

ai 'wafa' thi jo tamanna mujhe pa-bosi ki

pa-e-qatil pe gira ho ke juda sar mera