aaina dida-e-hairan nazar aata hai mujhe

aa.ina dīda-e-hairāñ nazar aatā hai mujhe

ya.anī zarra bhī bayābāñ nazar aatā hai mujhe

apnī hastī kā ye unvāñ nazar aatā hai mujhe

jaise ik ḳhvāb-e-pareshāñ nazar aatā hai mujhe

dasht-e-vahshat kī farāvānī-e-vahshat tauba

ab to dāman bhī garebāñ nazar aatā hai mujhe

phir qadam uThte haiñ rah rah ke bayābāñ kī taraf

phir junūñ silsila-jumbāñ nazar aatā hai mujhe

phir baḌhī jaatī hai har zaḳhm-e-jigar kī shorish

phir mirī ziist kā sāmāñ nazar aatā hai mujhe

aaj saaqī ne pilā.ī hai mujhe vo sahbā

jis ke har ghūñT meñ īmāñ nazar aatā hai mujhe

is qadar ishrat-e-hastī ne kiyā girvīda

har nafas shauq-badāmāñ nazar aatā hai mujhe

sa.ī-e-nākām pe be-sāḳhta hañs detā huuñ

jab koī tālib-e-armāñ nazar aatā hai mujhe

mil ga.ī mujh ko 'hasan' zauq-e-nazar sī daulat

ab to har phuul gulistāñ nazar aatā hai mujhe

aaina dida-e-hairan nazar aata hai mujhe

yani zarra bhi bayaban nazar aata hai mujhe

apni hasti ka ye unwan nazar aata hai mujhe

jaise ek KHwab-e-pareshan nazar aata hai mujhe

dasht-e-wahshat ki farawani-e-wahshat tauba

ab to daman bhi gareban nazar aata hai mujhe

phir qadam uThte hain rah rah ke bayaban ki taraf

phir junun silsila-jumban nazar aata hai mujhe

phir baDhi jati hai har zaKHm-e-jigar ki shorish

phir meri zist ka saman nazar aata hai mujhe

aaj saqi ne pilai hai mujhe wo sahba

jis ke har ghunT mein iman nazar aata hai mujhe

is qadar ishrat-e-hasti ne kiya girwida

har nafas shauq-badaman nazar aata hai mujhe

sai-e-nakaam pe be-saKHta hans deta hun

jab koi talib-e-arman nazar aata hai mujhe

mil gai mujh ko 'hasan' zauq-e-nazar si daulat

ab to har phul gulistan nazar aata hai mujhe