aaina hun ki main patthar hun ye kab puchhe hai

aa.ina huuñ ki maiñ patthar huuñ ye kab pūchhe hai

ziist mujh se mere jiine kā sabab pūchhe hai

munkashif hone lage jab se rumūz-o-asrār

kuchh savāl ab dil-e-ma.asūm ajab pūchhe hai

maqsad-e-zīst, koī ḳhvāb yā ḳhvāhish koii?

ham ne jab sī liye lab apne vo tab pūchhe hai

har koī apnī tag-o-dau meñ hai masrūf yahāñ

kaun ab kis kī udāsī kā sabab pūchhe hai

vahshat-e-dil meñ kamī ho bhī to kyaa, hāl-e-darūñ

aur baḌh jaatī hai kuchh, ham se vo jab pūchhe hai

jis ne barbād kiyā ḳhāna-e-dil rah rah kar

kyā qayāmat hai, vahī is kā sabab pūchhe hai

koī bhī rishta nikaltā nahīñ ham donoñ meñ

phir bhī kyuuñ ham se hamārā vo nasab pūchhe hai

saath guzre the kabhī arsa huaa, mujh se magar

aaj bhī terā patā rāh-e-talab pūchhe hai

ik nidā jis ko samajhte haiñ zamīr apnā sabhī

qabl-e-laġhzish hameñ is shakl meñ rab pūchhe hai

ab ye aalam hai ki ḳhud vahshat-e-dil bhī 'ḳhālid'

ghar mire der se aane kā sabab pūchhe hai

aaina hun ki main patthar hun ye kab puchhe hai

zist mujh se mere jine ka sabab puchhe hai

munkashif hone lage jab se rumuz-o-asrar

kuchh sawal ab dil-e-masum ajab puchhe hai

maqsad-e-zist, koi KHwab ya KHwahish koi?

hum ne jab si liye lab apne wo tab puchhe hai

har koi apni tag-o-dau mein hai masruf yahan

kaun ab kis ki udasi ka sabab puchhe hai

wahshat-e-dil mein kami ho bhi to kya, haal-e-darun

aur baDh jati hai kuchh, hum se wo jab puchhe hai

jis ne barbaad kiya KHana-e-dil rah rah kar

kya qayamat hai, wahi is ka sabab puchhe hai

koi bhi rishta nikalta nahin hum donon mein

phir bhi kyun hum se hamara wo nasab puchhe hai

sath guzre the kabhi arsa hua, mujh se magar

aaj bhi tera pata rah-e-talab puchhe hai

ek nida jis ko samajhte hain zamir apna sabhi

qabl-e-laghzish hamein is shakl mein rab puchhe hai

ab ye aalam hai ki KHud wahshat-e-dil bhi 'KHalid'

ghar mere der se aane ka sabab puchhe hai