aaine kitne yahan TuT chuke hain ab tak

aa.ine kitne yahāñ TuuT chuke haiñ ab tak

āfrīñ un pe jo sach bol rahe haiñ ab tak

TuuT jā.eñge magar jhuk nahīñ sakte ham bhī

apne nāmoñ kī hifāzat meñ tane haiñ ab tak

rahnumā un kā vahāñ hai hī nahīñ muddat se

qāfile vaale kise DhūñD rahe haiñ ab tak

apne is dil ko tasallī nahīñ hotī varna

ham haqīqat to tirī jaan chuke haiñ ab tak

fat.h kar sakta nahīñ jin ko junūñ maz.hab kā

kuchh vo tahzīb ke mahfūz qile haiñ ab tak

un kī āñkhoñ ko kahāñ ḳhvāb mayassar hote

niiñd bhar bhī jo kabhī so na sake haiñ ab tak

dekh lenā kabhī manzar vo ghane jangal kā

jab sulag uTTheñge jo ThūñTH dabe haiñ ab tak

roz nafrat ki havāoñ meñ sulag uThtī hai

ek chingārī se ghar kitne jale haiñ ab tak

un ujāloñ kā nayā naam batāo kyā ho

jin ujāloñ meñ añdhere hī pale haiñ ab tak

pur-sukūñ aap kā chehra ye chamaktī āñkheñ

aap bhī shahr meñ lagtā hai na.e haiñ ab tak

ḳhushk āñkhoñ ko ravānī hī nahīñ mil paa.ī

yuuñ to ham ne bhī ka.ī she'r kahe haiñ ab tak

duur apnī hai abhī pyaas bujhānā mushkil

aur 'dvij' aap to do kos chale haiñ ab tak

aaine kitne yahan TuT chuke hain ab tak

aafrin un pe jo sach bol rahe hain ab tak

TuT jaenge magar jhuk nahin sakte hum bhi

apne namon ki hifazat mein tane hain ab tak

rahnuma un ka wahan hai hi nahin muddat se

qafile wale kise DhunD rahe hain ab tak

apne is dil ko tasalli nahin hoti warna

hum haqiqat to teri jaan chuke hain ab tak

fath kar sakta nahin jin ko junun mazhab ka

kuchh wo tahzib ke mahfuz qile hain ab tak

un ki aankhon ko kahan KHwab mayassar hote

nind bhar bhi jo kabhi so na sake hain ab tak

dekh lena kabhi manzar wo ghane jangal ka

jab sulag uTThenge jo ThunTH dabe hain ab tak

roz nafrat ki hawaon mein sulag uThti hai

ek chingari se ghar kitne jale hain ab tak

un ujalon ka naya nam batao kya ho

jin ujalon mein andhere hi pale hain ab tak

pur-sukun aap ka chehra ye chamakti aankhen

aap bhi shahr mein lagta hai nae hain ab tak

KHushk aankhon ko rawani hi nahin mil pai

yun to hum ne bhi kai she'r kahe hain ab tak

dur apni hai abhi pyas bujhana mushkil

aur 'dwij' aap to do kos chale hain ab tak